புதுச்சேரியிலும் புகுந்தது கொரோனா.. மாஹேவில் மூதாட்டிக்கு பாதிப்பு.. தீவிர சிகிச்சை

புதுச்சேரி: புதுச்சேரி மாநிலம் மாஹே பிராந்தியத்தில் மூதாட்டி ஒருவருக்கு கொரோனா வைரஸ் உறுதி செய்யப்பட்டுள்ளது. மாஹே மருத்துவமனையில் அந்த மூதாட்டிக்கு தீவிர சிகிச்சை அளிக்கப்பட்டு வருகிறது.

சீன நாட்டில் உருவான கொரோனா வைரஸ் உலகம் முழுவதும் மிகப்பெரிய அளவில் பாதிப்பை ஏற்படுத்தி வருகிறது. சீனாவுக்கு அடுத்தபடியாக இத்தாலி, ஈரான், ஸ்பெயின் உள்ளிட்ட நாடுகளில் கொரோனா வைரஸ் காரணமாக அதிக அளவில் உயிரிழப்புகள் ஏற்பட்டுள்ளன. இந்தியாவிலும் கொரோனா வைரஸ் வேகமாக பரவி வருகிறது.

கொரோனா வைரசுக்கு இந்தியாவில் இதுவரை கர்நாடகாவைச் சேர்ந்த 76 வயது முதியவரும், டெல்லியைச் சேர்ந்த 69 வயது மூதாட்டியும் என இரண்டு பேர் உயிரிழந்துள்ளனர். மேலும் இந்தியாவில் இதுவரை 120 க்கும் மேற்பட்டோருக்கு கொரோனா பாதிப்பு உறுதி செய்யப்பட்டுள்ளது.
இந்நிலையில் புதுச்சேரி மாநிலத்தில் மூதாட்டி ஒருவருக்கு தற்போது கொரோனா வைரஸ் பாதிப்பு உறுதி செய்யப்பட்டுள்ளது.

புதுச்சேரி மாநிலத்தின் மாஹே பிராந்தியம் கேரள மாநிலத்திற்கு நடுவே உள்ளது. இங்கு சுமார் 50 ஆயிரத்திற்கும் மேற்பட்ட மக்கள் வசித்து வருகின்றனர். புதுச்சேரியிலிருந்து மாஹே பகுதி சுமார் 600 கி.மீ தொலைவில் உள்ளது.

இதனிடையே மாஹே பள்ளூர் பகுதியை சேர்ந்த 75 வயது மூதாட்டி ஒருவர் அபுதாபியில் உள்ள தனது உறவினர் வீட்டுக்கு சென்று விட்டு, கடந்த 3 நாட்களுக்கு முன் கோழிக்கோடு விமானம் நிலையம் மூலமாக மாஹேவுக்கு வந்துள்ளார். அப்போது அவருக்கு கடுமையான காய்ச்சல், சளி, தலைவலி ஏற்பட்டது. இதனால் அவர் மாஹே அரசு மருத்துவமனையில் சேர்க்கபட்டார். பின்பு அவரது ரத்த மாதிரிகள், கேரள மாநிலம் கோழிக்கோடு அரசு மருத்துவமனைக்கு அனுப்பி வைக்கப்பட்டது. பரிசோதனையில் அந்த மூதாட்டிக்கு கொரோனா வைரஸ் இருப்பது உறுதிசெய்யப்பட்டது.

இதனையடுத்து மாஹே அரசு மருத்துவமனையில் அந்த மூதாட்டி தனிமைபடுத்தப்பட்டு தீவிரமாக சிகிச்சை அளிக்கப்பட்டு வருகிறது. மேலும் அந்த மூதாட்டி வசித்து வந்த பகுதியில் வேறு யாருக்காவது, கொரோனா வைரஸ் பாதிக்கப்பட்டுள்ளதா? என சோதனை நடத்தப்பட்டு வருகிறது. மேலும் அந்த பகுதியில் மருத்துவ குழுக்களும் ஆய்வுப் பணிகளை மேற்கொண்டு வருகிறது. புதுச்சேரி மாநிலத்தில் கொரோனா வைரஸ் பாதித்த முதல் நபர் இந்த மூதாட்டி என்பது குறிப்பிடத்தக்கது.

English summary

Coronavirus has been confirmed for a old lady in Puducherry's Mahe region.