வசதியான குடும்பங்களுக்கு ‘கௌரவ ரேஷன் கார்டு’ வழங்கப்படும் - புதுச்சேரி அரசு அறிவிப்பு!
கௌரவ குடும்ப அட்டை பெற்றுக்கொள்ளலாம் என புதுச்சேரி அரசு அறிவித்துள்ளது.
புதுச்சேரி : அரசின் இலவசங்கள் தேவைப்படாத, வசதியான குடும்பங்களுக்கு கவுரவ குடும்ப அட்டை வழங்கப்படும் என புதுச்சேரி அரசு தெரிவித்துள்ளது. அதற்கான வழிமுறைகளும் வெளியிடப்பட்டுள்ளன.
புதுச்சேரியில் மஞ்சள் மற்றும் சிவப்பு என இரு விதமான குடும்ப அட்டைகள் அரசால் வழங்கப்பட்டுள்ளது. இதில், சிவப்பு ரேஷன் அட்டை ஏழை பொதுமக்களுக்கும், மஞ்சள் வண்ண அட்டை அரசு ஊழியர்கள் மற்றும் வசதி படைத்தவர்களுக்கு வழங்கப்பட்டுள்ளது.
இதில் சிவப்பு ரேஷன் அட்டை வைத்திருக்கும் பலர் அரிசி உள்ளிட்ட இலவச பொருட்களை பெறாத நிலையில், அவற்றின் மூலம் ரேஷன் கடைகளில் மோசடிகள் நடைபெறுவதாக புகார் எழுந்தது.
கௌரவ ரேஷன் கார்டு
இதையடுத்து, இலவச அரிசி பெறாதவர்களின் சிவப்பு குடும்ப அட்டைகள் ரத்து செய்யப்படும் என அரசு எச்சரித்திருந்தது. இந்நிலையில், இலவசங்கள் பெற விரும்பாத வசதியானவர்கள் தங்களின் குடும்ப அட்டைகளை கௌரவ குடும்ப அட்டைகளாக மாற்றிக்கொள்ளலாம் என புதுச்சேரி அரசு அறிவித்துள்ளது.
இலவசங்கள் தேவைப்படாவிட்டால்
இது தொடர்பாக புதுச்சேரி மாநில அரசு வெளியிட்டுள்ள அறிக்கையில், புதுச்சேரி யூனியன் பிரதேசத்தில் குடிமைப்பொருள் வழங்கல் துறையால், கவுரவ குடும்ப அட்டைகள் வழங்கப்பட உள்ளது. அரசின் இலவசங்கள் தேவைப்படாத, வசதி வாய்ந்த குடும்பங்கள், இந்த வாய்ப்பை பயன்படுத்தி புதுச்சேரி அரசின் கவுரவ குடும்ப அட்டை பெற்றுக்கொள்ளும்படி வேண்டிக்கொள்ளப்படுகிறார்கள்.
சிறப்பு குடிமக்கள்
கவுரவ குடும்ப அட்டை பெற்றவர்கள், புதுவையின் சிறப்பு பிரஜைகளாக கருதப்பட்டு குடிமைப்பொருள் வழங்கல் துறையால் அளிக்கப்படும் அரசின் இலவசங்கள் எதுவும் வழங்கப்படாது. புதுச்சேரியில் தற்போது அனைத்து வகை (சிவப்பு / மஞ்சள் நிறம்) குடும்ப அட்டை பெற்றுள்ளவர்களும் கவுரவ குடும்ப அட்டை பெற தகுதி வாய்ந்தவர்கள்.
வாட்ஸ் அப் மூலம்
புதிய கவுரவ குடும்ப அட்டை வேண்டுபவர்கள் குடும்ப தலைவர் கையொப்பமிட்ட விண்ணப்பத்தையும் அசல் குடும்ப அட்டையையும் குடிமைப்பொருள் வழங்கல் துறை அலுவலகத்தில் ஒப்படைத்து கவுரவ குடும்ப அட்டை பெற்றுக்கொள்ளலாம். உதவிக்கு 94421 94480 என்ற தொலைபேசியில் தொடர்பு கொண்டு அல்லது அதே எண்ணில் Whatsapp/ குறுஞ்செய்தி மூலமாக தகவல் பெறலாம் எனத் தெரிவிக்கப்பட்டுள்ளது.
Click it and Unblock the Notifications
Sign in with Google