அட நம்புங்க.. நம்ம சேலம் அமானி கொண்டலாம்பட்டியில் மணமகன் பெயர் சோசலிசம்; மணமகள் பெயர் மம்தா பேனர்ஜி

சேலம்: சேலம் அருகே அடுத்த வாரம் நடைபெறும் ஒரு திருமணத்துக்கான அழைப்பிதழ்தான் இப்போது சமூக வலைதளங்களில் வைரலாகி வருகிறது. அப்படி என்ன சுவாரசியம் அந்த திருமண அழைப்பிதழில் என்கிறீர்களா?

சேலம் அமானி கொண்டலாம்பட்டியில் வரும் 13-ந் தேதி ஒரு திருமணம் நடைபெறுகிறது. இந்த திருமண விழாவில் இந்திய கம்யூனிஸ்ட் கட்சியின் மாநில செயலாளர் இரா. முத்தரசன், அக்கட்சியின் மாநில துணைச் செயலாளர் சுப்பராயன் எம்.பி. ஆகியோர் பங்கேற்கின்றனர்.

இந்திய கம்யூனிஸ்ட் கட்சியின் நிர்வாகி மோகனின் 3-வது மகனுக்குதான் இந்த திருமணம் நடக்கிறது. மணமகள் அதே ஊரைச் சேர்ந்த பழனிசாமி என்பவரின் மகள்!

மணமகனின் பெயர் A.M. சோசலிசம். ஆம் இப்படித்தான் 3-வது மகனுக்கு பெயர் வைத்திருக்கிறார் மோகன். மற்ற 2 மகன்களுக்கும் மோகன் வைத்த பெயர் என்ன தெரியுமா? கம்யூனிசம், லெனினிசம். அத்துடன் முடியவில்லை... இடதுசாரி பிரியம்.. பேரனுக்கு மார்க்சிசம் என பெயர் வைத்திருக்கின்றனர்.

சரி மணமகனின் பெயர்தான் இப்படி சோசலிசம் என வித்தியாசமாக இருக்கிறதே என நினைக்காதீர்கள்..

மணமகளின் பெயரை கேட்டாலே அதிரும்.. ஆம் மணமகள் பெயர் மம்தா பேனர்ஜி. மேற்கு வங்கத்தில் இடதுசாரிகளுக்கு முடிவுரை எழுதிய அதே மம்தா பானர்ஜியின் பெயர்தான் மணமகளுக்கு வைக்கப்பட்டிருக்கிறது!

English summary

In Salem Bride and groom names are Socialism and Mamta Banerjee. Their marriage Invitation went viral in Social Medias.