சிங்கப்பூர் கவிஞர் புதுமைத்தேனீ மா. அன்பழகன் காலமானார்.. இலக்கிய உலகம் ஆழ்ந்த இரங்கல்

Updated: Wednesday, April 22, 2026, 11:51 [IST]

Subscribe to Oneindia Tamil

சிங்கப்பூர்: பிரபல தமிழ் இலக்கியவாதியும், சிங்கப்பூர் கவிமாலை அமைப்பின் காப்பாளருமான புதுமைத்தேனீ மா. அன்பழகன் உடல்நலக்குறைவால் காலமானார். அவருக்கு வயது 83.

நாகப்பட்டினம் மாவட்டம், வேதாரண்யத்தை அடுத்த ஆயக்காரன்புலத்தைச் சேர்ந்தவர் மா. அன்பழகன். வணிக நிர்வாகத்தில் இளங்கலைப் பட்டம் (BBA) பெற்ற இவர், வேதாரண்யம் தொகுதியின் முன்னாள் சட்டமன்ற உறுப்பினர் மா. மீனாட்சி சுந்தரத்தின் சகோதரரும், தற்போதைய திமுக வேட்பாளர் புகழேந்தியின் சித்தப்பாவும் ஆவார்.

மறைந்த தமிழக முதல்வர் கருணாநிதி தலைமையில், எம்.ஜி.ஆர் முன்னிலையில் இவரது திருமணம், 1971-ஆம் ஆண்டு நடைபெற்றது என்பது குறிப்பிடத்தக்கது.

இலக்கியப் பங்களிப்பு

கடந்த 32 ஆண்டுகளாகச் சிங்கப்பூரில் வசித்து வந்த மா. அன்பழகன், அங்குள்ள தமிழ் இலக்கிய வளர்ச்சிக்குத் தூணாகத் திகழ்ந்தார். சிங்கப்பூர் மற்றும் தமிழ்நாட்டில் இலக்கிய உலகில் இவர் மிக முக்கியமான நபர் ஆவார்.

கவிமாலை: சிங்கப்பூர் கவிமாலை அமைப்பை எட்டாண்டு காலம் தலைமை தாங்கி நடத்தியவர். இறுதிக்காலம் வரை அதன் காப்பாளராக இருந்து, பல இளம் கவிஞர்களை உருவாக்கினார்.

படைப்புகள்: கவிதை, கட்டுரை, புதினம் எனப் பல்வேறு தளங்களில் இயங்கிய இவர் 38 நூல்களை எழுதியுள்ளார். மேலும், பல எழுத்தாளர்கள் சுமார் 150-க்கும் மேற்பட்ட நூல்களை வெளியிட இவர் உறுதுணையாக இருந்துள்ளார்.

விருதுகளும் அங்கீகாரங்களும்

இலக்கியத் துறையில் இவரது சேவையைப் பாராட்டி பல்வேறு உயரிய விருதுகள் வழங்கப்பட்டுள்ளன:

1990-ஆம் ஆண்டு கிருஷ்ணகிரியில் நடைபெற்ற உலகத் தமிழ்க் கவிஞர் பேரவை விழாவில், முன்னாள் முதல்வர் கருணாநிதி முன்னிலையில் உவமைக் கவிஞர் சுரதா கரங்களால் "கவிமாமணி" விருது வழங்கப்பட்டது.

2003-ஆம் ஆண்டு சிங்கப்பூர் அமைச்சர் தர்மன் சண்முகரத்தினம் கரங்களால் "முத்தமிழ்க் காவலர்" விருது வழங்கி கௌரவிக்கப்பட்டார்.

அரசியல் மற்றும் சமூகப் பணி

திமுக இலக்கிய அணியின் மாநிலப் பொருளாளராக ஆறு ஆண்டுகள் பணியாற்றிய இவர், திராவிடச் சிந்தனைகளுடன் இறுதிவரை இணைந்திருந்தார். திரைத்துறை மற்றும் சமூகத் தொண்டு ஆகியவற்றிலும் இவர் குறிப்பிடத்தக்கப் பங்களிப்பை வழங்கியுள்ளார்.

மா. அன்பழகனின் மறைவு சிங்கப்பூர் மற்றும் தமிழக இலக்கியச் சூழலில் ஈடு செய்ய முடியாத இழப்பாகக் கருதப்படுகிறது. அவரது மறைவுக்கு இலக்கிய அமைப்புகளும், அரசியல் தலைவர்களும் தங்கள் ஆழ்ந்த இரங்கலைத் தெரிவித்து வருகின்றனர்.