பும்ரா இணைந்தாலும் சரி.. பங்காளி பல்தான்ஸ் தோல்வியை யாராலும் தடுக்க முடியாது.. காரணமே இதுதான்!

மும்பை: மும்பை அணியின் நட்சத்திர வேகப்பந்துவீச்சாளர் ஜஸ்பிரிட் பும்ரா காயம் காரணமாக ஓய்வில் இருந்த நிலையில், தற்போது அந்த அணியுடன் இணைந்துள்ளார். நாளைய ஆட்டத்தில் பும்ரா விளையாடுவது சந்தேகமாக இருந்தாலும், அடுத்தடுத்த போட்டிகளில் அவர் மும்பை அணிக்காக களமிறங்குவார் என்று பார்க்கப்படுகிறது. ஆனால் மும்பை அணியில் பும்ரா இணைந்தாலும், அந்த அணி வெற்றிப் பாதைக்கு திரும்புவது எளிதாக இருக்காது என்று பார்க்கப்படுகிறது.

ஐபிஎல் தொடரில் 5 முறை கோப்பையை வென்ற சிஎஸ்கே மற்றும் மும்பை ஆகிய அணிகள் மிகப்பெரிய பின்னடைவை சந்தித்துள்ளது. சிஎஸ்கே அணி ஹாட்ரிக் தோல்வியை அடைந்திருக்கும் நிலையில், மும்பை அணி 3 போட்டிகளில் விளையாடி 2 தோல்விகளை சந்தித்துள்ளது. பேட்டிங் மற்றும் பவுலிங் பலமாக இருந்தாலும், மும்பை அணி அடுத்தடுத்து தோல்வியை சந்திப்பது ஆச்சரியத்தை ஏற்படுத்தியுள்ளது.

இந்த நிலையில் மும்பை அணியுடன் நட்சத்திர வீரர் ஜஸ்பிரிட் பும்ரா இணைந்துவிட்டதாக அறிவிக்கப்பட்டுள்ளது. முதுகு பிடிப்பு பிரச்சனை காரணமாக ஓய்வில் இருந்த பும்ரா, என்சிஏவில் தீவிர பயிற்சியில் ஈடுபட்டு வந்தார். இந்த நிலையில் நாளை ஆர்சிபி அணிக்கு எதிரான போட்டிக்கு முன்பாக இன்று பும்ரா மும்பை அணியுடன் இணைந்துள்ளார்.

ஆனாலும் மும்பை அணி வெற்றிப் பாதைக்கு திரும்புவது எளிதாக இருக்காது என்று பார்க்கப்படுகிறது. ஏனென்றால் மும்பை அணியின் தோல்விக்கு ஹர்திக் பாண்டியா சில மோசமான கேப்டன்சி முடிவுகளும், பேட்ஸ்மேன்களின் மோசமான பேட்டிங்குமே காரணமாக அமைந்துள்ளது. அதாவது மிட்சல் சான்ட்னர், போல்ட், சஹர், விக்னேஷ் புத்தூர், அஸ்வனி குமார் என்று மும்பை அணியின் பவுலிங் சிறப்பாகவே இருக்கிறது.

இதில் பும்ரா சேர்ந்தால், கூடுதலாக 10 ரன்களை கட்டுப்படுத்தி சில விக்கெட்டுகளை வீழ்த்துவார். ஆனால் மும்பை அணியின் பேட்டிங்கில் எந்த வீரரும் ஃபார்மில் இல்லாமல் உள்ளனர். ரோஹித் சர்மா, ரிக்கல்டன், வில் ஜாக்ஸ், சூர்யகுமார் யாதவ், திலக் வர்மா உள்ளிட்டோர் மோசமான ஃபார்மில் இருக்கிறார்கள்.

திலக் வர்மா கடந்த போட்டியில் ரிட்டையர்ட் அவுட்டாகி வெளியேற்றப்பட்டார். அதேபோல் ஃபினிஷர் ரோலில் களமிறங்கும் ஹர்திக் பாண்டியா முழுமையான பேட்டிங் திறமையை வெளிப்படுத்தவில்லை. இதனால் பும்ராவின் இணைப்பு மும்பை அணிக்கு உதவியாக அமைந்தாலும், பேட்ஸ்மேன்களின் செயல்பாடுகள் சிறப்பாக இல்லாமல் வெற்றி பெற முடியாது என்று பார்க்கப்படுகிறது.

English summary

MI vs RCB: Even after the addition of Bumrah, Mumbai Indians can't win until their batsmen come to form in IPL 2025