ஜப்பான் செல்ல தேர்வான 7 தமிழக மாணவர்கள்!

Published: Wednesday, September 10, 2014, 11:19 [IST]

Subscribe to Oneindia Tamil

சென்னை: கிழக்கு ஆசியா மற்றும் ஜப்பான் நாடுகளுக்கு இடையேயான மாணவர்கள் பரிவர்த்தனை திட்டத்தின் கீழ், தமிழக மாணவர்கள் 7 பேர் ஜப்பான் நாட்டுக்குச் செல்ல தேர்வாகியுள்ளனர்.

"ஜெனிசிஸ்" என்னும் இந்த திட்டத்தின் கீழ் வருடம்தோறும் பள்ளி மாணவர்கள் இந்தியாவிலிருந்து ஜப்பான் நாட்டிற்குச் செல்வார்கள்.

இது ஒரு குறுகிய கால சுற்றுப்பயணமாக அம்மாணவர்களுக்கு அமையும்.

ஜப்பானில் கல்வி வளர்ச்சி:

கல்வி, விளையாட்டு போன்ற துறைகளில் சிறந்து விளங்கும் இந்திய மாணவர்கள் 7 பேரும் ஜப்பான் நாட்டில் 10 நாட்கள் தங்கி, அந்த நாட்டின் கலாச்சாரம், விளையாட்டு, கல்வித் திறமைகளை வளர்க்க உதவியாகச் செயல்படுவார்கள்.

மாணவர்கள் தேர்வு:

இதற்காக பள்ளிக் கல்வித் துறை சார்பில் அனைத்து தலைமை ஆசிரியர்களுக்கும் சுற்றறிக்கை அனுப்பப்பட்டு மாணவர்களின் பெயர் உள்ளிட்ட விவரங்கள் பெறப்பட்டன. இந்த விவரங்கள் மத்திய மனிதவள ஆற்றல் மேம்பாட்டு அமைச்சகத்துக்கு அனுப்பப்பட்டன.

மொத்தம் 7 பேர்:

அதிலிருந்து கீழ்க்கண்ட 7 மாணவர்கள் ஜப்பான் செல்வதற்காகத் தேர்வு செய்யப்பட்டுள்ளனர்.

படிப்பு மற்றும் விளையாட்டு:

மூன்று பேர் படிப்புக்காகவும், 4 பேர் விளையாட்டுப் பிரிவிலும் தேர்வு செய்யப்பட்டுள்ளனர்.

தேர்வு பெற்றவர்கள் விவரம்:

அவர்கள் தமிழ்நாட்டின் பல்வேறு மாவட்டப் பள்ளிகளில் இருந்து தேர்ந்தெடுக்கப்பட்டுள்ளனர். அந்த 7 மாணவர்கள் எஸ். பிரபாகரன் , எஸ்.சில்வியா, டி.யோகேஸ்வரி, வி.ரோஹித், ஆர்.ராமகிருஷ்ணன், கே.அருண் வெங்கடேஷ், எம்.காயத்ரி ஆகியோர் ஆவர்.

மாவட்ட வாரியாக தேர்வு:

இவர்கள் சென்னை, சேலம், நாகர்கோவில், ஏற்காடு ஆகிய இடங்களில் அமைந்துள்ள பல்வேறு அரசுப் பள்ளிகளில் இருந்து தேர்வு செய்யப்பட்டுள்ளனர்.

விரைவில் தேதி அறிவிப்பு:

இவர்களுடன் மேற்பார்வையாளராக வேலப்பஞ்சாவடி அரசு உயர்நிலைப் பள்ளியைச் சேர்ந்த ஆசிரியர் எஸ்.ரவி தேர்வு செய்யப்பட்டுள்ளார். இவர்கள் ஜப்பான் செல்லும் தேதி உள்ளிட்ட விவரங்கள் விரைவில் அறிவிக்கப்படும் என பள்ளிக் கல்வித் துறை அதிகாரிகள் தெரிவித்தனர்.

Published On September 10, 2014