4 தொகுதி இடைத்தேர்தல்.. வேட்புமனுத் தாக்கல் செய்வதற்கான கால அவகாசம் நிறைவு

திருப்பரங்குன்றம்: தமிழகத்தில் இடைத்தேர்தல் நடைபெறும் திருப்பரங்குன்றம் உட்பட 4 சட்டமன்ற தொகுதிகளிலும், வேட்புமனு தாக்கல் செய்வதற்கான கால அவகாசம் நிறைவு பெற்றது. இடைத்தேர்தல் நடைபெற உள்ள தொகுதிகளில் வேட்புமனு தாக்கல் இன்று பிற்பகல் 3 மணியுடன் முடிவடைந்தது. தமிழகத்தில் காலியாக உள்ள ஒட்டப்பிடாரம், திருப்பரங்குன்றம், அரவக்குறிச்சி, சூலூர் ஆகிய 4 சட்டமன்ற தொகுதிக்கும் இடைத்தேர்தல் நடத்த எதிர்க்கட்சிகள் வலியுறுத்தின. இது தொடர்பாக நீதிமன்றத்திலும் வழக்கு தொடரப்பட்டது.

வழக்கை விசாரித்த நீதிமன்றம் இடைத்தேர்தல் நடத்துவது தொடர்பாக தேர்தல் ஆணையம் பரிசீலிக்க உத்தரவிட்டது. இதனையடுத்து தமிழகத்தில் காலியாக உள்ள 4 தொகுதிக்கும், வரும் மே 19-ல் தேதி இடைத்தேர்தல் நடைபெறும் என அறிவிக்கப்பட்டது. இந்நிலையில் 4 தொகுதிகளிலும் வேட்புமனு தாக்கல் செய்ய கொடுத்த அவகாசம் இன்றுடன் முடிந்துள்ளது.

ஆளுங்கட்சியான அதிமுக, நடிகர் கமலின் மக்கள் நீதி மய்யம் உள்ளிட்ட கட்சிகளின் வேட்பாளர்கள் இன்று வேட்புமனுக்களை தாக்கல் செய்தனர். 4 தொகுதிகளிலும் போட்டியிடும், அதிமுக வேட்பாளர்கள் இன்று தங்கள் வேட்புமனுக்களை தாக்கல் செய்தனர்.

இதேபோல் சூலூர் சட்டமன்ற தொகுதியை தவிர மற்ற 3 தொகுதிகளிலும் மக்கள் நீதிமய்யம் சார்பில் போட்டியிடும் வேட்பாளர்கள் தங்கள் வேட்புமனுக்களை தாக்கல் செய்தனர்.

4 தொகுதி இடைத்தேர்தலுக்காக தாக்கல் செய்யப்படும் வேட்புமனுக்கள் மீதான பரிசீலனை நாளை நடைபெறுகிறது. மே 2-ம் தேதி தாக்கல் செய்த வேட்புமனுக்களை திரும்ப பெற கடைசி நாளாகும். அன்றைய தினம் மாலையே இறுதி வேட்பாளர் பட்டியல் அறிவிக்கப்படும்.

மே 19-ம் தேதி 4 தொகுதிகளுக்கும் ஒரே கட்டமாக இடைத்தேர்தல் நடைபெற உள்ளது. அப்போது பதிவாகும் வாக்குகள் மே 23-ம் தேதி எண்ணப்பட்டு முடிவுகள் அறிவிக்கப்படும்.

English summary

The last date for filing nominations is in the four assembly constituencies, including the Tiruparkunkanam in Tamil Nadu.