3 நாள் இல்லை பாஸ், டிசம்பர் 2ம் தேதி வரை மழை வெளுக்க வாய்ப்புள்ளது!

Published: Friday, November 27, 2015, 11:48 [IST]

Subscribe to Oneindia Tamil

சென்னை: தமிழகத்தின் கடலோரப் பகுதிகளில் நாளை முதல் கன மழை பெய்யும் என்று சென்னை வானிலை மையம் தெரிவித்துள்ளதால் மக்கள் மீண்டும் கவலை அடைந்துள்ளனர்.

சமீபத்தில் பெய்த மழையின் பாதிப்பே இன்னும் அகலாத நிலையில், மறுபடியும் ஒரு தொடர் மழை வரப் போகிறதே என்ற கவலையில் மக்கள் உள்ளனர்.

அதேசமயம், இந்த மழை 3 நாட்கள் மட்டும் இருக்காது என்றும், டிசம்பர் 2ம் தேதி வரை இருக்கக் கூடும் என்ற தகவல் மேலும் கவலையைக் கூட்டுவதாக உள்ளது.

சென்னை மையம் சொல்வது என்ன?

சென்னை வானிலை மையத்தின் அடுத்த 5 நாட்களுக்கான வானிலை முன்னறிவிப்பைப் பார்க்கும்போது சனிக்கிழமை முதல் கன மழை பெய்யும் என்று தெரிவிக்கப்பட்டுள்ளது.

சனிக்கிழமை முதல்

சனிக்கிழமை காலை 8.30 மணி முதல் 29ம் தேதி காலை 8. 30 மணி வரையிலான கால கட்டத்தில் தமிழகத்திலும், புதுச்சேரியிலும், கடலோரத் தமிழகம், தென் மத்திய தமிழகம், டெல்டா மாவட்டங்களில் பரவலாக கன மழை பெய்யும் எனத் தெரிவிக்கப்பட்டுள்ளது.

29 முதல் 30 வரை

அதேபோல 29ம் தேதி காலை 8. 30 மணி முதல் 30ம் தேதி காலை 8.30 மணி வரையிலான காலகட்டத்தில், கடலோரத் தமிழகம் மற்றும் புதுச்சேரியில் பரவலாக கன மழை பெய்யும் எனத் தெரிவிக்கப்பட்டுள்ளது.

30 முதல் டிசம்பர் 1 வரை

30ம் தேதி காலை 8.30 மணி முதல் டிசம்பர் 8.30 மணி வரைகடலோரத் தமிழகம் மற்றும் புதுச்சேரியில் பரவலாக கன முதல் மிக கன மழை பெய்யும் என எச்சரிக்கப்பட்டுள்ளது. இன்றுதான் பாதிப்பு அதிகம் இருக்கும் எனத் தெரிகிறது.

டிசம்பர் 1 முதல் 2ம் தேதி வரை

டிசம்பர் 1ம் தேதி முதல் 2ம் தேதி வரையிலான காலகட்டத்தில் பரவலாக கன மழை இருக்கும் என கணிக்கப்பட்டுள்ளது.

நார்வே மையம் சொல்வது என்ன?

நார்வே வானிலை மையம் வெளியிட்டுள்ள முன்னறிவிப்பின்டி ஞாயிற்றுக்கிழமை முதல் டிசம்பர் 1ம் தேதி வரை கன மழை இருக்கும் என்று தெரிவிக்கப்பட்டுள்ளது.

ஞாயிறு மிதமான மழை

அதில், ஞாயிற்றுக்கிழமையன்று சென்னையில் மிதமான மழை பெய்யும் என்று தெரிவிக்கப்பட்டுள்ளது. மழை அளவு 1.1 செ.மீட்டராக இருக்கும் எனத் தெரிவிக்கப்பட்டுள்ளது.