விடிய, விடிய பெய்த மழையால் நெல்லையில் 27 வீடுகள் இடிந்தன!

நெல்லை: நெல்லை மாவட்டத்தில் பெரும்பாலான பகுதிகளில் நேற்று முன்தினம் இரவில் தொடங்கி விடிய, விடிய பலத்த மழை நீடித்தது. அதிகபட்சமாக சங்கரன்கோவிலில் 139 மில்லி மீட்டர் மழை பெய்துள்ளது. நெல்லை மாநகராட்சிக்கு உட்பட்ட பகுதிகளில் 27 வீடுகள் இடிந்துள்ளன.

வடகிழக்கு பருவமழை நெல்லை மாவட்டத்தில் தொடங்கி பெய்து வந்தது. இந்த நிலையில் 3 நாட்கள் வெயில் சுட்டெரித்தது. இடையிடையே அவ்வப்போது லேசான மழையாக பெய்தது.

இந்த நிலையில், நேற்று முன்தினம் மாலையில் தொடங்கி நெல்லை மாவட்டத்தின் பெரும்பாலான பகுதிகளில் பலத்த மழை பெய்யத் தொடங்கியது.

நெல்லையில் நேற்று முன்தினம் இரவில் விடிய விடிய கனமழை பெய்தது. இதனால் பாளையங்கோட்டை அண்ணா நகர், ஹைகிரவுண்டு பகுதியில் வெள்ளம் பெருக்கெடுத்து ஓடியது. மனகாவலம்பிள்ளை நகர் பகுதியில், பிரான்குளம் பகுதியில் தண்ணீர் பெருமளவு தேங்கியது.

மனகாவலம்பிள்ளைநகர், அருந்ததியர் காலனி, கக்கன் நகர், சாந்தி நகரில் உள்ள 500க்கும் மேற்பட்ட வீடுகளுக்குள் வெள்ளம் புகுந்தது. அந்த வீடுகளில் இடுப்பளவுக்கு தண்ணீர் தேங்கி நின்றது. பெரும்பாலான வீடுகளில் இருந்த பொருட்கள் தண்ணீரில் மிதந்தன.

பாளையங்கோட்டை முருகன்குறிச்சி நேருஜி பூங்காவில் தண்ணீர் தேங்கியது. பாளையங்கோட்டை ரெயில்வே ஃபீடர் ரோடு, செயின்ட் பால்ஸ் ரோடு மற்றும் இலந்தைகுளம் பகுதிகளிலும் மழைநீர் வீடுகளுக்குள் புகுந்தது. ஒரு வீடு இடிந்தது.

நெல்லை சந்திப்பு பஸ்நிலையம் முன்பு பாதாள சாக்கடையில் மழைநீரும் தேங்கி நின்றது. இதனால் ரோட்டில் வெள்ளநீரும், சாக்கடையும் கலந்து ஓடியது. தச்சநல்லூர் அருகே கீழக்கரையில் உள்ள உச்சிமாகாளி அம்மன் கோவில் பீடங்கள் இடிந்து விழுந்தன. நெல்லை மாநகராட்சி பகுதியில் நேற்றும், நேற்று முன்தினமும் பெய்த மழையில் 27 வீடுகள் இடிந்துள்ளன.

நெல்லை மாவட்டத்தில் நேற்று காலை 8 மணியுடன் முடிவடைந்த 24 மணி நேரத்தில் பதிவாகிய மழை அளவு மில்லி மீட்டரில்: சங்கரன்கோவில்-139, ராதாபுரம்-104, பாளையங்கோட்டை-102, ஆய்குடி-100, சிவகிரி-57.2, தென்காசி-56.2, செங்கோட்டை-43, குண்டாறு -42.3, நெல்லை-40, நம்பியாறு-29, பாபநாசம்-20, நாங்குநேரி-14, சேரன்மாதேவி-10, சேர்வலாறு-7, அம்பை-4.2, மணிமுத்தாறு-3.8.

English summary

Tinunelveli district receiving heavy rain fall.