காதலியை அழைத்து வந்து திருமணம்.. காதலன் குடும்பத்தினருக்கு சரமாரி வெட்டு - வேளாங்கண்ணியில் பரபரப்பு!

நாகை: வேளாங்கண்ணிக்கு காதலியை அழைத்து வந்து திருமணம் செய்த காதலன் உள்ளிட்ட குடும்பத்தினரை சரமாரியாக வெட்டிவிட்டு, பெண்ணை தூக்கிச் சென்ற சம்பவம் பரபரப்பை ஏற்படுத்தியது. வேளாங்கண்ணியில் மதம் மாறி மணம் முடித்ததால் மணமகன் குடும்பத்தினரை வெட்டிய மணமகள் குடும்பத்தினர் 9 பேர் கைது செய்யப்பட்டுள்ளனர்.

கர்நாடக மாநிலம் பெங்களூர் நாகவாடா பகுதியைச் சேர்ந்த டேனியல் என்பவரின் மகன் ராகுல் (22) தொட்டி குண்டாவைச் சேர்ந்த ராஜாராவ் மகள் கீர்த்தனாவை காதலித்தார். இருவரும் வெவ்வேறு மதத்தைச் சேர்ந்தவர்கள் என்பதால் இவர்களது காதலுக்கு பெண் வீட்டார் கடும் எதிர்ப்பு தெரிவித்துள்ளனர். இதையடுத்து அவர்கள் புதன்கிழமை வேளாங்கண்ணியில் திருமணம் செய்தனர். ராகுலின் தந்தை டேனியல் (49), தாய் கலையரசி (41), உறவினர் பிரகாஷ் (34) ஆகியோர் திருமணத்திற்கு ஆதரவாக உடன் தங்கியிருந்தனர்.

இதையறிந்த கீர்த்தனாவின் உறவினர்கள் வியாழக்கிழமை வேளாங்கண்ணிக்கு வந்து, அவர்கள் தங்கியிருந்த விடுதியில் ராகுல் குடும்பத்தினரை அரிவாளால் வெட்டி, கீர்த்தனாவை வலுக்கட்டாயமாக அழைத்துச் சென்றனர். காயமடைந்த ராகுல் உள்ளிட்டோர் நாகை அரசு மருத்துவக் கல்லூரி மருத்துவமனையில் சிகிச்சைக்காக அனுமதிக்கப்பட்டனர்.

இதுகுறித்து வேளாங்கண்ணி போலீசார் வழக்குப் பதிவு செய்து, விசாரணை மேற்கொண்டு வருகின்றனர். வேளாங்கண்ணி போலீசார் வழக்கு பதிவு செய்து, சிசிடிவி காட்சிகளின் அடிப்படையில், பெண்ணின் குடும்பத்தார் சென்ற காரை விரட்டிச் சென்றனர்.

கடலுார் மாவட்டம், சேத்தியாதோப்பு அருகே சென்ற பெங்களூரைச் சேர்ந்த குபேந்திரா ராவ் மகன்கள் வெங்கோராவ் (30), ராம்நாத் ராவ் (40) ஆகிய இருவரையும் கைது செய்தனர். அதைத்தொடர்ந்து, பெண்ணின் தாய், தந்தை உள்ளிட்ட 9 பேர் கைது செய்யப்பட்டுள்ளனர். இந்தச் சம்பவம் அப்பகுதியில் பெரும் பரபரப்பை ஏற்படுத்தி உள்ளது.

English summary

A man who brought his girlfriend to Velankanni and married her. Bride's family brutally beating groom family and abducting girl has created a stir. Nine members of the bride's family have been arrested for beating up the groom's family in Velankanni.