மதுரை காவல் நிலையத்தில் துப்பாக்கியால் சுட்டுத் தற்கொலை செய்த பெண் காவலரின் கணவர் சரண்!

மதுரை: மதுரை திருமங்கலம் அருகே காவல் நிலையத்தில் துப்பாக்கியால் சுட்டுத் தற்கொலை செய்து கொண்ட பெண் காவலர் கருப்பாயியின் கணவர் திருச்சி போலீஸில் சரணடைந்துள்ளார். இதற்கிடையே, கருப்பாயி மரணத்தில் சந்தேகம் இருப்பதாக அவரது உறவினர்கள் புதுப் புகாரைக் கூறியுள்ளனர்.

மதுரை, திருமங்கலத்தை அடுத்துள்ள பேரையூர் அருகே உள்ள சலுப்பப்பட்டி கிராமத்தைச் சேர்ந்தவர் வெள்ளைச்சாமி. இவரது மகள் கருப்பாயி (28). இவர் நாகையாபுரம் போலீஸ் நிலையத்தில் முதல்நிலை காவலராக வேலை பார்த்து வந்தார். இவருக்கும், அதே பகுதியைச் சேர்ந்த சின்னச்சாமி என்பவரது மகன் பெத்தண்ணசாமி (32) என்பவருக்கும் 7 வருடங்களுக்கு முன்பு திருமணம் நடைபெற்றது. பெத்தண்ணசாமி ராணுவத்தில் பணிபுரிந்து வருகிறார். இவர்களுக்கு குழந்தை இல்லை.

சில மாதங்களுக்கு முன்பு ஒரு மாத விடுமுறையில் பெத்தண்ணசாமி ஊருக்கு வந்தார். அப்போது அவர் தினமும் குடித்து விட்டு வீட்டுக்கு வந்து கருப்பாயியை அடித்து கொடுமைப்படுத்தியுள்ளார். விடுமுறை முடிந்தும் அவர் பணிக்குத் திரும்பவில்லை. வீட்டிலேயே இருந்தார். தினமும் குடித்தார். மனைவியுடன் சண்டை போட்டு வந்தார். இதனால் கருப்பாயி பெரும் வேதனையிலும், மன உளைச்சலிலும் இருந்ததாக தெரிகிறது

இந்த நிலையில் இன்று காலையில் காவல் நிலையத்தில் துப்பாக்கியால் தனது தலையில் சுட்டு தற்கொலை செய்து கொண்டார் கருப்பாயி. இந்த சம்பவம் பெரும் பரபரப்பை ஏற்படுத்தியுள்ளது.

கருப்பாயி மரணத்தில் சந்தேகம் என உறவினர்கள் புகார்

இந்த நிலையில் கருப்பாயி மரணத்தில் சந்தேகம் இருப்பதாக அவரது உறவினர்கள் பிரச்சினை எழுப்பியுள்ளனர். கருப்பாயி பயன்படுத்திய துப்பாக்கி காவல் நிலைய இன்ஸ்பெக்டரின் துப்பாக்கியாகும். அது எப்படி கருப்பாயிக்கு கிடைத்தது என்று அவர்கள் கேள்வி எழுப்பியுள்ளனர். இந்த சந்தேகத்தை எழுப்பி அவர்கள் திருமங்கலம் அரசு மருத்துவமனை வளாகத்தில் போராட்டம் நடத்தினர். உடலையும வாங்க மறுத்தனர்.

திருச்சி போலீஸில் சரணடைந்த கணவர்

இதற்கிடையே கருப்பாயியின் கணவரான பெத்தண்ணசாமி, திருச்சி கண்டோன்மென்ட் காவல் நிலையத்தில் சரணடைந்துள்ளார். அவரிடம் போலீஸார் விசாரணை நடத்தி வருகின்றனர்.

English summary

Thirumangalam woman constable Karuppayi's husband Bethannasamy has surrendered in Trichy and police are investigating him.