செல்போனைத் தூக்கிப் போடுங்க... கேமராவைத் தூக்கிப் பிடிங்க- இன்று உலக புகைப்பட தினம்

Published: Wednesday, August 19, 2015, 18:19 [IST]

Subscribe to Oneindia Tamil

சென்னை: இன்று உலக புகைப்பட தினம்... கருப்பு, வெள்ளை காலம் தாண்டி செல்பிக்களில் வந்து நிற்கும் புகைப்படங்கள் நம்முடைய இவ்வுலக வாழ்வின் ஞாபகங்களை எப்போதும் தேக்கி வைத்துக் காட்டும் கண்ணாடிகள்.

அத்தகைய புகைப்படக்கலையின் பெருமையை அனைவரும் உணர்ந்து கொள்ளும் வகையில் ஆண்டுதோறும் ஆகஸ்ட் 19 ஆம் தேதி உலக புகைப்பட தினம் கொண்டாடப்படுகிறது.

அதிலும், இன்று 176 வது ஆண்டு புகைப்பட தினமாகும். புகைப்பட கருவியை உருவாக்கு வதற்கான முயற்சி 13 வது நூற்றாண்டிலேயே தீவிரமடைந்து விட்டது. அப்போது கேமரா அப்ஸ்குரா என்ற கருவி கண்டுபிடிக்கப்பட்டது.

குட்டி குட்டியாய் கேமராக்கள்:

அதைத் தொடர்ந்து, சிறியதும், பெரியதுமாக பல்வேறு கருவிகள் கண்டுபிடிக்கப்பட்டன. மிகப்பெரிய முன்னேற்றம் 1825 ஆம் ஆண்டு ஏற்பட்டது. பிரான்ஸை சேர்ந்த ஜோசப் நீப்ஸ் என்பவர் ஒரு கட்டிடத்தின் புகைப்படத்தை தனது கருவியில் படம் எடுத்தார். ஆனால், அந்த புகைப்படம் 8 மணி நேரத்திற்கு பிறகு அழிந்துவிட்டது.

கண்ணாடி நெகடிவ் புகைப்படங்கள்:

1839 ஆம் ஆண்டு சர் ஜான் ஹெர்செல் என்பவர் கண்ணாடியை பயன்படுத்தி நெகட்டிவ்களை எடுக்கும் முறையை கண்டுபிடித் தார். அவர்தான், இக்கலைக்கு போட்டோகிராபி என்று பெயர் வைத்தார்.

ஒளியின் எழுத்து புகைப்படம்:

இது கிரேக்க மொழியி லிருந்து வந்த சொல்லாகும். அதன் அர்த்தம் ஒளியின் எழுத்து என்பதாகும். அதே ஆண்டு, லூயிஸ் டாகுரே என்பவர், சில்வர் காப்பர் பிளேட்டில் பிம்பங்கள் விழும் வகையிலான புகைப்படம் எடுக்கும் முறையை அறிமுகப்படுத்தினார்.

பேப்பர் பிலிம் புகைப்படங்கள்:

1888 ஆம் ஆண்டு ஜார்ஜ் ஈஸ்ட்மேன் முதல் முறையாக பேப்பர் பிலிம்களை பயன்படுத்தி பாக்ஸ் கேமராவில் புகைப்படம் எடுக்கும் முறையை கண்டறிந்தார். அதைத்தொடர்ந்து 1900 இல் பாக்ஸ் பிரவுனி என்ற வகை கேமராக்களை கோடாக் அறிமுகப்படுத்தினார். 35 மில்லி மீட்டர் ஸ்டில் கேமராக்களை 1913 இல் ஆஸ்கர் பர்னாக் வடிவ மைத்தார். இது புகைப்படத் துறையையே புரட்டிப்போட்டது.

எல்லாம் டிஜிட்டல் கேமராக்கள் மயம்:

முதல் டிஜிட்டல் கேமராவை சோனி நிறுவனம் 1981 ஆம் ஆண்டு தயாரித்தது. அதன் பின்பு, தற்போது வரை டிஜிட்டல் கேமராக்களில் பல்வேறு முன்னேற்றங்கள் ஏற்பட்டு வருகின்றன. ஒவ்வொரு நினைவுகளையும் தன்னுள் அடக்கி அழகிய பரிசாய் நமக்கு அளிக்கும் புகைப்படக் கலை மேல்மேலும் முன்னேற்றம் அடைய வாழ்த்துக்கள்!

Published On August 19, 2015