அஜாக்கிரதையால் தொலைத்த பணம்! ஜாக்கிரதையுடன் ஒப்படைப்பு! மெக்கானிக் செயலால் திருச்சி நெகிழ்ச்சி!

திருச்சி: திருச்சியில் பேருந்து நிலையத்தில் கேட்பாரற்று கிடந்த பணத்தை எடுத்து பொறுப்புடன் காவல்நிலையத்தில ஒப்படைத்த மெக்கானிக்கை போலீசார் பாராட்டி கவுரவித்துள்ளனர்.

மேலும் கேட்பாரற்று கிடந்து கண்டெடுக்கப்பட்ட பணத்துக்கு சொந்தக்காரர் யார் என கண்டெறிந்து உரியவரிடம் போலீசார் ஒப்படைத்தனர்.

அனாவசியமாக கிடந்த பணம்

திருச்சி மாவட்டம் ஆலம்பட்டியை சேர்ந்த அழகர்சாமி மெக்கானிக் கடை வைத்துள்ளார். திங்கட் கிழமையன்று அழகர்சாமி வழக்கம்போல் கடைக்கு வருவதற்காக பேருந்தில் இருந்து இறங்கியபோது பேப்பர் சுற்றிய ஒரு பொட்டலம் இருப்பதை பார்த்தார். பொட்டலம் என்றாலே ஏதாவது வெடிகுண்டாக இருக்குமோ என்று எடுக்காமல் கடந்து செல்பவர்கள அதிகம். ஆனால் அதை கையில் எடுத்து அழகர்சாமி பார்த்தபோது கட்டு கட்டாக பணம் இருந்துள்ளது.

பணம் போலீசிடம் ஒப்படைப்பு

அதில் எவ்வளவு பணம் இருக்கிறது என்றுகூட எண்ணிக்கூட பார்க்காமல் உடனடியாக கண்டொன்மென்ட் காவல்நிலையத்திற்கு சென்று போலீசாரிடம் ஒப்படைத்தார் மெக்கானிக். இதை அடுத்து போலீசார் நடத்திய விசாரணையில் மணப்பாறையை சேர்ந்த வழக்கறிஞர் மனோ விஜயசங்கர் பணத்தை தொலைத்துவிட்டு தேடிவருவதாக தெரியவந்துள்ளது.

உரியவரிடம் ஒப்படைப்பு

இந்த விவரம் அறிந்த கண்டோன்மென்ட் காவல் ஆய்வாளர் வேல்முருகன் விஜயசங்கரை அழைத்து பேருந்து நிலையத்தில் கண்டெடுக்கப்பட்ட பணத்தின் அடையாளத்தை கூறுமாறு கேட்டார். விஜயசங்கர் சொன்ன அடையாளங்கள் பொருந்திப் போனதால் அவரிடம் பணம் ஒப்படைக்கப்பட்டது.

மெக்கானிக்குக்கு பாராட்டு

அதுமட்டுமின்றி பணம் கிடைத்தவுடன் எடுத்து பாக்கெட்டில் போட்டுக் கொண்டு செல்லாமல் காவலரிடம் ஒப்படைத்த இருசக்கர வாகன மெக்கானிக் அழகர்சாமியை பாராட்டி, சால்வை அணிவித்து கவுரவித்தார் காவல் ஆய்வாளர் வேல்முருகன்.

சமூக வலைதளவாசிகளும் பாராட்டு

1 ரூபாய் கீழே கிடைத்தால் கூட தொலைத்தவனின் விதி என்று எடுத்து பாக்கெட்டில் போட்டுக் கொண்டு செல்பவர்கள் மத்தியில், உழைக்காமல் கிடைக்கும் பணத்தால் உறக்கம் வராது எண்ணி அந்த பணத்தை உரியவரிடம் ஒப்படைக்க உதவி மெக்கானிக்கை சமூக வலைதளங்களில் பாராட்டி வருகின்றனர். இதன் மூலம் அழகர்சாமி ரிப்பேர் செய்வது பழுதான பைக்குகளை மட்டுமல்ல; பழுதான எண்ணங்கள் கொண்ட இதயங்களையும்தான்.

English summary

Trichy mechanic the money that he found the bus stand. Police gave it to the owner.