வேகம் பத்தல.. வெள்ள நிவாரண பணியில் சுணக்கம்.. தாசில்தார் டிரான்ஸ்பர்.. தூத்துக்குடி கலெக்டர் அதிரடி!
தூத்துக்குடி: தூத்துக்குடி மாவட்டம் ஏரல் தாலுகாவில் வெள்ள நிவாரண பணிகளில் முறையாக செயல்படாத தாசில்தார் கைலாச குமாரசாமி பணியிட மாற்றம் செய்யப்பட்டுள்ளார்.
தென் மாவட்டங்களில் கடந்த டிசம்பர் 17 மற்றும் 18 ஆகிய தேதிகளில் பெய்த அதி கனமழையால், தூத்துக்குடி, திருநெல்வேலி, தென்காசி, கன்னியாகுமரி மாவட்டங்களில் பெரும்பாலான பகுதிகளில் வெள்ளநீர் சூழ்ந்து, மக்களின் இயல்பு வாழ்க்கை கடுமையாக பாதிக்கப்பட்டுள்ளது. குறிப்பாக, தூத்துக்குடி மாவட்டத்தின் பல்வேறு பகுதிகளில் நிலைமை மோசமாக உள்ளது.
தூத்துக்குடி மாவட்டம் ஸ்ரீவைகுண்டம், திருச்செந்தூர், ஏரல், காயல்பட்டினம், ஆறுமுகநேரி, ஆத்தூர், தென்திருப்பேரை மற்றும் சுற்று வட்டார பகுதிகள் முற்றிலும் துண்டிக்கப்பட்டு தனித் தீவுகளாகியுள்ளன. ஸ்ரீவைகுண்டம், ஏரல் சுற்றுவட்டார பகுதிகளில் கனமழையால் பாதிக்கப்பட்ட மக்களை படகு மூலம் மீட்கும் பணி நடைபெற்று வருகிறது. வெள்ளம் சூழ்ந்த பகுதிகளில் வசித்த மக்கள் மீட்கப்பட்டு நிவாரண முகாம்களில் தங்க வைக்கப்பட்டுள்ளனர்.
இப்பகுதிகளை சுற்றியுள்ள ஏராளமான கிராமங்களில் ஆயிரக்கணக்கான வீடுகள் முற்றிலும் இடிந்து விழுந்தன. வீடுகளில் உள்ள பொருட்கள் அனைத்தும் நாசமாகியுள்ளன. தற்போது நிவாரண முகாம்களில் வசித்து வரும் இப்பகுதி மக்கள் வெள்ள பாதிப்பில் இருந்து மீள்வது எப்படி என்ற கவலையில் உள்ளனர். தூத்துக்குடி மாவட்டத்தில் நிவாரண பணிகள் அரசால் தீவிரப்படுத்தப்பட்டுள்ளன.
தூத்துக்குடி மாவட்டத்தில் மழையால் கடுமையாக பாதிக்கப்பட்ட பகுதிகளில் நிவாரணம் மற்றும் மீட்புப் பணிக்காக 8 மூத்த ஐஏஎஸ் அதிகாரிகள் நியமனம் செய்யப்பட்டுள்ளனர். பாதிக்கப்பட்ட பகுதிகளில் உள்ள மக்களை மீட்டு, உணவு உள்ளிட்ட அத்தியாவசிய பொருட்களை வழங்குதல், சுத்தமான குடிநீர் வழங்குதல், மருத்துவ முகாம்கள் நடத்துதல் உள்ளிட்ட பணிகளுக்காக ஐஏஎஸ் அதிகாரிகள் நியமிக்கப்பட்டுள்ளனர்.
இந்நிலையில் தூத்துக்குடி மாவட்டம் ஏரல் தாலுகாவில் வெள்ள நிவாரண பணிகளில் முறையாக செயல்படாத தாசில்தார் கைலாச குமாரசாமி பணியிட மாற்றம் செய்யப்பட்டுள்ளார். அவருக்குப் பதிலாக கோபாலகிருஷ்ணனை ஏரல் தாலுகா தாசில்தாராக நியமனம் செய்து தூத்துக்குடி மாவட்ட ஆட்சித் தலைவர் லட்சுமிபதி ஐஏஎஸ் உத்தரவு பிறப்பித்துள்ளார்.
Click it and Unblock the Notifications
Sign in with Google