ஓட்டு வாங்குவதற்காக என்ன வேண்டுமானாலும் சொல்லலாம்.. அதிமுகவை அட்டாக் செய்த ராமதாஸ்!

Updated: Sunday, January 18, 2026, 17:45 [IST]

Subscribe to Oneindia Tamil

விழுப்புரம்: தேர்தலின் போது ஓட்டு வாங்குவதற்காக எந்த வாக்குறுதிகளை வேண்டுமானாலும் வெளியிடலாம் என்று அதிமுக முதற்கட்ட வாக்குறுதிகளை பாமக நிறுவனர் ராமதாஸ் விமர்சித்துள்ளார். கூட்டணி தொடர்பான அறிவிப்பை கூடிய விரைவில் வெளியிடுவேன் என்றும் ராமதாஸ் கூறியுள்ளார்.

எம்ஜிஆரின் 109வது பிறந்தநாளையொட்டி அதிமுகவின் முதற்கட்ட வாக்குறுதிகளை எடப்பாடி பழனிசாமி வெளியிட்டார். 2021 சட்டசபைத் தேர்தல் வாக்குறுதியை கொஞ்சம் பட்டி டிங்கரிங் செய்து எடப்பாடி பழனிசாமி அறிவித்துள்ளதாக விமர்சனங்கள் எழுந்துள்ளது. மகளிர் உரிமைத் தொகை மாதம் ரூ.2 ஆயிரம், ஆண்களுக்கும் இலவச பேருந்து பயணத் திட்டம் உள்ளிட்டவை பலரையும் திரும்பி பார்க்க வைத்துள்ளது.

இதனை திமுக, சீமான் உள்ளிட்ட கட்சியினர் கடுமையாக விமர்சித்து வருகின்றனர். இந்த நிலையில் பாமக நிறுவனர் ராமதாஸ் தலைமையில் பாமகவின் நிர்வாகக் குழு கூட்டம் விழுப்புரம் மாவட்டம் தைலாபுரத்தில் நடைபெற்றது. இதன்பின் செய்தியாளர்களை சந்தித்து ராமதாஸ் பேசுகையில், பாமக சார்பில் மிகப்பெரிய வெற்றிக் கூட்டணி அமைக்கப்படும்.

கட்சியின் வளர்ச்சிப் பணிகள் முன்னெப்போதும் இல்லாத வகையில் எழுச்சியுடன் இருக்கிறது. இந்த சட்டசபைத் தேர்தலில் பாமக சார்பாக போட்டியிட 4,109 பேர் விருப்ப மனுக்களை அளித்துள்ளனர். இது பாமக வரலாற்றில் காணாத நிகழ்வாகும். இது எங்கள் தரப்புக்கும் மகிழ்ச்சியையும், எழுச்சியையும் ஏற்படுத்தியுள்ளது. மக்கள் அனைவரும் நல்ல கூட்டணி என்று பாராட்டும் வகையில் நாங்கள் கூட்டணி அமைப்போம்.

ஒரு வலுவான கூட்டணியை அமைக்க தீவிரமாக முயன்று வருகிறோம். கூட்டணி குறித்த அதிகாரப்பூர்வ அறிவிப்பு விரைவில் வெளியாகும். அதிமுக பொதுச்செயலாளர் எடப்பாடி பழனிசாமி தேர்தலின் போது ஓட்டு வாங்குவதற்காக எதை வேண்டுமானாலும் சொல்லலாம். ஆனால் மக்கள் தான் உண்மையான எஜமானார்கள். அவர்கள் யாருக்கு வாக்களிக்க வேண்டும் என்பதை சரியாக தீர்மானிப்பார்கள்.

கூட்டணி குறித்த அறிவிப்பை விரைந்து அறிவிக்க வேண்டும் என்று நிர்வாகக் குழுவில் கேட்டுக் கொண்டனர். அதனால் கூட்டணி குறித்து விரைவில் ஒரு நல்ல முடிவை வெளியிடுவேன் என்று தெரிவித்தார். ஏற்கனவே அன்புமணி அதிமுக உடனான கூட்டணியை உறுதி செய்துவிட்டார். இதனால் ராமதாஸ் தரப்பு யாருடன் கூட்டணி அமைக்கப் போகிறது என்ற கேள்வி எழுந்துள்ளது.

திமுகவுடன் ஜிகே மணி, அருள் உள்ளிட்டோர் நெருக்கம் காட்டி வந்தாலும், விசிக தலைவர் திருமாவளவன் ஒப்புக்கொண்டால் மட்டுமே ராமதாஸ் தரப்பை ஏற்கும் முடிவில் முதல்வர் ஸ்டாலின் உள்ளார். இதனால் இன்னும் சில வாரங்களில் ஸ்டாலின் - திருமாவளவன் இடையிலான சந்திப்பு நடக்கும் என்று எதிர்பார்க்கப்படுகிறது.