விக்கிரவாண்டி இடைத்தேர்தல்.. திடீரென பாமகவினரும் பட்டாசு வெடித்து கொண்டாட்டம்.. காரணத்தை பாருங்க!

விழுப்புரம்: விக்கிரவாண்டி இடைத்தேர்தலில் 11 சுற்றுகள் முடிவில் 39,000 வாக்குகள் வித்தியாசத்தில் திமுக வேட்பாளர் முன்னிலையில் உள்ளார். இதனை திமுகவினர் கொண்டாடி வரும் நிலையில், விக்கிரவாண்டி வாக்கு எண்ணும் மையத்தில் பாமகவினரும் பட்டாசு வெடித்து கொண்டாடி வருகிறார்கள். பணம், பொருள் கொடுக்காமல் அதிக வாக்குகள் பெற்றிருப்பதாக பாமகவினர் கொண்டாட்டத்தில் ஈடுபட்டு வருகின்றனர்.

விக்கிரவாண்டி தொகுதி எம்எல்ஏவாக இருந்த புகழேந்தி மரணம் அடைந்ததை அடுத்து அந்த தொகுதிக்கு இடைத்தேர்தல் அறிவிக்கப்பட்டது. இதில், திமுக சார்பாக அன்னியூர் சிவா வேட்பாளராக அறிவிக்கப்பட்டார். இதேபோல் பாஜக கூட்டணியில் உள்ள பாமக அன்புமணியை வேட்பாளராக நிறுத்தியது. நாம் தமிழர் கட்சி சார்பில் நிறுத்தப்பட்டார்.

அதிமுக இந்த தேர்தலை புறக்கணித்தது. தேமுதிகவும் இந்த தேர்தலை புறக்கணித்தது. இதன் காரணமாக விக்கிரவாண்டி இடைத்தேர்தலில் திமுக - பாமக - நாம் தமிழர் கட்சி என மும்முனை போட்டி நிலவியது. இன்று இடைத்தேர்தலில் பதிவான வாக்குகள் எண்ணப்பட்டன. இதில் ஆரம்பம் முதலே திமுக வேட்பாளர் அன்னியூர் சிவா முன்னிலை பெற்று வருகிறார்.

விக்கிரவாண்டி இடைத்தேர்தலில் பாமக வேட்பாளர் அன்புமணி 8 சுற்றுகளின் முடிவில் 19,812 வாக்குகள் பெற்று 2-வது இடத்தில் இருந்தார். தொடர்ந்து 11 சுற்றுகள் முடிவில் பாமக வேட்பாளரை விட திமுக வேட்பாளர் அன்னியூர் சிவா 39,000 வாக்குகள் வித்தியாசத்தில் முன்னிலையில் உள்ளார்.

இதனால், விக்கிரவாண்டியில் பல இடங்களில் திமுகவினர் பட்டாசு வெடித்து கொண்டாடினர். அதேபோல அண்ணா அறிவாலயத்திலும் திமுகவினர் பட்டாசு வெடித்தும் இனிப்புகள் வழங்கியும் கொண்டாடி வருகிறார்கள். திமுக தலைவரும், முதல்வருமான மு.க ஸ்டாலினும் அண்ணா அறிவாலயத்துக்கு வருகை தந்தார்.

இது ஒருபக்கம் இருக்க இரண்டாவது இடத்தில் உள்ள பாமகவினரும் விக்கிரவாண்டி தொகுதி வாக்கு எண்ணும் மையம் அருகே பட்டாசு வெடித்து கொண்டாட்டத்தில் ஈடுபட்டனர். அப்போது, வாக்குக்கு பணம், பொருள் கொடுக்காமல் அதிக வாக்குகள் பெற்றிருப்பதால் பட்டாசு வெடித்து கொண்டாடுவதாக பாமகவினர் கூறினர்.

English summary

The DMK candidate is leading by a margin of 39,000 votes at the end of 11 rounds in the Vikravandi by-election. While the DMK is celebrating this, the BAM is also celebrating by bursting firecrackers at the Vikravandi vote counting centre. The Bamakavins are celebrating that they have got more votes without giving money or material.