திமுக இளைஞரணி மாநாடு.. இருக்கைகளில் ஸ்நாக்ஸ் பைகள்.. பிரியாணி ரெடி! தடபுடல் ஏற்பாடுகள்!

விருதுநகர்: திமுக இளைஞரணி நிர்வாகிகள் மாநாடு விருதுநகர் மாவட்டம் கல்குறிச்சியில் நடைபெறும் நிலையில், இந்த மாநாட்டில் பங்கேற்கும் நிர்வாகிகளுக்காக ஸ்நாக்ஸ், குடிநீர் பாட்டில் , ஜூஸ் அடங்கிய பைகள் நாற்காலிகளில் வைக்கப்பட்டுள்ளன. மேலும் பிரியாணியும் வழங்கப்பட்டு வருகிறது.

தமிழ்நாடு சட்டசபை தேர்தல் நெருங்கி வரும் சூழலில், அனைத்து கட்சிகளும் தேர்தல் வேலைகளில் தீவிரமாக இறங்கி உள்ளன. அந்த வகையில் திமுகவும் தனது கட்சி கட்டமைப்பை வலுப்படுத்தும் வேலையில் மும்முரம் காட்டி வருகிறது.

கடந்த ஆண்டு ஜூன் மாதம் மதுரையில் பொதுக்குழு கூட்டம், அதைத் தொடர்ந்து உடன்பிறப்பே வா சந்திப்பு, கரூரில் திமுக முப்பெரும் விழா, திமுக இளைஞரணி சார்பில் திருவண்ணாமலையில் வடக்கு மண்டல மாநாடு, திருப்பூர் மற்றும் தஞ்சையில் மகளிர் அணி சார்பில் வெல்லும் தமிழ்ப் பெண்கள் மாநாடு என திமுக தொடர்ச்சியாக தீவிரம் காட்டி வருகிறது.

அதன் தொடர்ச்சியாக, விருதுநகர் மாவட்டம் காரியாபட்டி அருகே கல்குறிச்சியில் இன்று தென் மண்டல இளைஞரணி மாநாடு நடைபெறுகிறது. தமிழகம் தலை குனியாது என்ற தலைப்பில் நடைபெறும் இந்த மாநாட்டில் திமுக தலைவரும், முதலமைச்சருமான மு.க. ஸ்டாலின் கலந்து கொண்டு சிறப்புரையாற்ற இருக்கிறார்.

தேர்தலை எதிர்நோக்கி, திமுகவின் இளைஞர் அணி, மகளிர் அணி மாநாடுகள் அடுத்தடுத்து மண்டல வாரியாக நடைபெற்று வருகின்றன. அந்த வகையில், விருதுநகர் மாவட்டம் கல்குறிச்சியில் திமுக இளைஞரணி தென் மண்டல மாநாடு இன்று மாலை நடைபெறுகிறது. இதில் 20 திமுக அமைப்பு மாவட்டங்களைச் சேர்ந்த ஒரு லட்சத்திற்கும் மேற்பட்ட நிர்வாகிகள் பங்கேற்கின்றனர்.

இதற்கான ஏற்பாடுகள் விறுவிறுப்பாக நடைபெற்று வருகின்றன. தென் மண்டலத்தை சார்ந்த மாவட்ட, மாநகர, ஒன்றிய நகர, பேரூராட்சி அலுவலக இளைஞரணி நிர்வாகிகள் உள்பட சுமார் ஒன்றரை லட்சம் பேர் இந்த மாநாட்டில் பங்கேற்கின்றனர். மாநாட்டுக்காக ஏறத்தாழ 100 ஏக்கர் பரப்பளவில் முன்னேற்பாடுகள் பிரம்மாண்டமாக நடைபெற்றன.

இந்த நிகழ்ச்சியில் கலந்து கொள்பவருக்கு பிஸ்கட், குடிநீர் பாட்டில், நொறுக்குத் தீனி, கடலை மிட்டாய், ஜூஸ் பாட்டில் உள்ளிட்ட பொருட்கள் அடங்கிய சிற்றுண்டி பை வழங்கப்படுகிறது. இளைஞரணி நிர்வாகிகள் அமர்வதற்காக போடப்பட்டுள்ள நாற்காலிகளில் இந்த சிற்றுண்டி பை ரெடியாக வைக்கப்பட்டுள்ளது. மேலும், அனைவருக்கும் மட்டன் பிரியாணி வழங்கவும் ஏற்பாடு செய்யப்பட்டுள்ளது.

ஒரு லட்சத்து 50 ஆயிரத்திற்கும் மேற்பட்ட நிர்வாகிகளுக்காக சுத்தமான முறையில் சுகாதாரமான முறையில் சுடச்சுட பிரியாணி செய்யப்பட்டு வருகின்றன. திமுக இளைஞரணி மாநாட்டில் பங்கேற்கும் நிர்வாகிகள் அனைவருக்கும் மட்டன் பிரியாணியை சுகாதாரமான முறையில் தயார் செய்து அனைத்து பிரியாணியையும் பேக் செய்து வாகனங்களில் கொண்டு செல்லப்பட்டு வழங்கப்பட்டு வருகிறது.

English summary

While the DMK Youth Wing office-bearers' conference is being held in Kalkurichi, Virudhunagar district, bags containing snacks, water bottles, and juice have been placed on the chairs for the office-bearers attending the conference. Biryani is also being served.