உலகளவில் போட்டுத் தாக்கும் கொரோனா.. ஆறுதல் தரும் இந்தியா.. ஆனா 'அது' மட்டும் குறையல

Updated: Tuesday, May 4, 2021, 11:40 [IST]

Subscribe to Oneindia Tamil

வாஷிங்டன்: உலகளவில் கொரோனா காரணமாக 154,165,720 பேர் பாதிக்கப்பட்டுள்ள சூழலில், இந்தியாவில் கடந்த நான்கு நாட்களில் வைரஸ் தாக்கம் சற்று குறைந்துள்ளது.

உலகம் முழுவதும் கொரோனா இரண்டாம் அலையின் தாக்கம் பல நாடுகளை பாதித்துள்ளது. அமெரிக்கா, ஜெர்மனி, ரஷ்யா, இங்கிலாந்து உள்ளிட்ட பல நாடுகளில் கொரோனா பரவல் இன்னும் நீடித்துக் கொண்டிருக்கிறது.

அதேபோல், உயிரிழப்புகளும் தொடர்ந்து அதிகரித்து வருகிறது. உலகம் முழுவதும் கொரோனாவால் 3,226,583 பேர் உயிரிழந்துள்ளனர். ரஷ்யா, இங்கிலாந்து உள்ளிட்ட நாடுகளில் அதிகளவில் உயிரிழப்புகள் தொடருகின்றன. ஆனால், அனைத்துக்கும் உச்சமாக உள்ள நாடு இந்தியா தான்.

ஒரே நாளில்

உலகம் முழுவதும் ஒட்டுமொத்தமாக 154,165,720 பேர் கொரோனா காரணமாக பாதிக்கப்பட்டுள்ள நிலையில், 131,545,776 பேர் சிகிச்சையில் இருந்து குணமடைந்துள்ளனர். அமெரிக்காவில் 38,514 பேர் புதிதாக கொரோனா தொற்றால் பாதிக்கப்பட்டுள்ளனர். அதுமட்டுமின்றி, அங்கு ஒரேநாளில் 443 பேர் கொரோனாவுக்கு உயிரிழந்துள்ளனர்.

இங்கிலாந்து ஓகே

அதேபோல், பிரேசிலில் ஒரே நாளில் 36,524 பேருக்கு கொரோனா தொற்று உறுதி செய்யப்பட்டிருக்கிறது. அங்கு கடந்த 24 மணி நேரத்தில் மட்டும் 1,054 பேர் உயிரிழந்துள்ளனர். அதேசமயம், இங்கிலாந்தில் பாதிப்பு சற்று குறைந்துள்ளது. அங்கு, 1,649 பேருக்கு கொரோனா தொற்று உறுதி செய்யப்பட்டுள்ளது. அதேபோல், பிரான்சில் 3,760 பேருக்கு புதிதாக கொரோனா தொற்று உறுதியாகியுள்ளது. அங்கு ஒரேநாளில் 311 பேர் கொரோனாவால் உயிரிழந்துள்ளனர்

இத்தாலி மோசம்

ரஷ்யாவில் கடந்த 24 மணி நேரத்தில் மேலும் 8,489 பேருக்கு கொரோனா தொற்று உறுதி செய்யப்பட்டுள்ளது. இதன்மூலம் ரஷ்யாவில் வைரஸ் தொற்றால் பாதிக்கப்பட்டோர் எண்ணிக்கை 48,31,744 ஆக உயர்ந்துள்ளது. கொரோனா தொற்றுக்கு மேலும் 311 பேர் உயிரிழந்ததால், அங்கு பலியானோர் எண்ணிக்கை 1 லட்சத்து 11 ஆயிரத்து 198 ஆக உயர்ந்துள்ளது. அதேபோல், இத்தாலியில் 5,948 பேருக்கு புதிதாக கொரோனா தொற்று ஏற்பட்டிருப்பதாக பதிவாகியுள்ளது. அங்கு கடந்த 24 மணி நேரத்தில் 256 பேர் கொரோனாவுக்கு உயிரிழந்துள்ளனர்.

குறையும் எண்ணிக்கை

இந்தியாவைப் பொறுத்தவரை, கடந்த சில நாட்களாக சற்று ஆறுதல் தரும் வகையில், கொரோனா எண்ணிக்கை உள்ளது. நான்கு நாட்களுக்கு முன்பு 4.01 லட்சம் என்றிருந்த நிலையில், கொரோனா வைரஸ் தாக்கம் தற்போது குறைந்துள்ளது. கடந்த 24 மணி நேரத்தில் 3 லட்சத்து 68 ஆயிரத்து 147 பேருக்கு புதிதாக தொற்று உறுதி செய்யப்பட்டுள்ளது. ஆனால், இதில் ஷாக் தரும் செய்தி என்னவெனில், தொற்று பாதிப்பால் ஒரே நாளில் 3,417 பேர் உயிரிழந்துள்ளனர்.