“வரி விஷயத்தில் இந்தியா எங்களை கொல்கிறது!” அப்படியே மாற்றி உருட்டும் டிரம்ப்.. எதுக்கு இந்த சீனு?

வாஷிங்டன்: அமெரிக்கா விதித்துள்ள 50% வரி காரணமாக திருப்பூர், கோவையில் தொழில்கள் முற்றிலுமாக முடங்கியுள்ளன. இந்நிலையில், இறக்குமதி வரி விஷயத்தில் இந்தியா எங்களை கொல்கிறது என டிரம்ப் முதலை கண்ணீர் வடித்திருக்கிறார்.

"சீனா, இந்தியா, பிரேசில் எங்களைக் கொல்கிறது. எனது வரிக் கொள்கைகளால், அமெரிக்கா மீதான தாக்குதல்கள் குறைகின்றன. இந்தியா அதிக வரி விதிக்கும் நாடாக இருந்தது. இப்போது அவர்கள் வரி இல்லை என்று கூறியுள்ளனர்.

நான் வரிகளை விதிக்கவில்லை என்றால், அவர்கள் ஒருபோதும் அந்த சலுகையை வழங்கியிருக்க மாட்டார்கள். எனவே, வரிகள் அவசியம். நாம் பொருளாதார ரீதியாக வலிமையாக இருப்போம். அவர்கள் இனி எங்களைப் பயன்படுத்திக் கொள்ள முடியாது" என்று தி ஸ்காட் ஜென்னிங்ஸ் வானொலி நிகழ்ச்சியில் பேசிய டிரம்ப் கூறியிருக்கிறார்.

ஆனால் உண்மை வேறாக இருக்கிறது. டிரம்ப் போட்டிருக்கும் வரி, பொருட்களை கொண்டதாக அல்ல, மாறாக நாடுகளை அடிப்படையாக கொண்டதாக இருக்கிறது. அதாவது வியட்நாமிலிருந்து ஜவுளி இறக்குமதி செய்தால் 17%, வங்கதேசத்திலிருந்து இறக்குமதி செய்தால் 19%, அதே இந்தியாவிலிருந்து இறக்குமதி செய்தால் 50% வரி. தொடக்கத்தில் இந்தியாவிலிருந்து அமெரிக்கா செல்லும் பொருட்களுக்கு 16% வரியை டிரம்ப் போட்டார். அதன் பின்னர் பேச்சுவார்த்தைக்கு வரவில்லை என்று சொல்லி வரியை 25% ஆக உயர்த்தினார். தற்போது ரஷ்யாவிடம் எண்ணெய் வாங்குகிறோம் என்று சொல்லி 50% ஆக வரியை உயர்த்தியுள்ளார்.

இதனால் அமெரிக்காவுடனான ரூ. 7.2 லட்சம் கோடி ஏற்றுமதி வணிகத்தில் 50% அளவுக்கு பாதிக்கப்பட்டிருக்கிறது. திருப்பூரிலிருந்து ஆண்டுக்கு ரூ.12-15 ஆயிரம் கோடி மதிப்பிலான பொருட்கள் அமெரிக்காவுக்கு ஏற்றுமதியாகும். ஆனால் வரி உயர்வு காரணமாக ரூ.1,500 கோடி அளவுக்கான பொருட்கள் தற்போது தேக்கமடைந்திருக்கின்றன. அமெரிக்க சந்தைக்கு சுமார் 40% அளவுக்கு திருப்பூரிலிருந்து பின்னலாடைகள் ஏற்றுமதி செய்யப்பட்டு வந்தன. இப்போது வரி காரணமாக இது தடைப்பட்டிருக்கிறது. இதே நிலை நீடித்தால் நாடு முழுவதும் சுமார் 12 கோடி பேர் வேலையை இழக்கும் அபாயம் ஏற்படும் என அஞ்சப்படுகிறது.

சூழல் இப்படி இருக்கையில், இந்தியா அமெரிக்காவை கொல்கிறது என்று டிரம்ப் உருட்டியிருக்கிறார். ஆனால் இந்தியா விடாப்பிடியாக இருந்தால் மட்டுமே அமெரிக்காவை சமாளிக்க முடியும் என்றும் பொருளாதார நிபுணர்கள் கூறுகின்றனர்.

English summary

US President Donald Trump has sharply criticized India, claiming high tariffs "kill" the US and vowing to no longer let the country "take advantage" of American trade. This statement signals potential aggressive trade policies toward India if he returns to power, impacting bilateral economic relations.