இந்துபோபியா.. ரொம்பவே பெரிய பிரச்சினை.. அமெரிக்காவில் மிக முக்கிய தீர்மானம்! இதுதான் முதல்முறை

இந்துபோபியா

இப்படி பலரும் பல இடங்களில் சென்று குடியேறும் நிலையில், இந்துக்களுக்கு எதிரான இந்துபோபியா மனநிலை அதிகரித்து வருவதாகவும் ஒரு தரப்பினர் தொடர்ந்து குற்றஞ்சாட்டி வருகின்றனர். இதனால் வெளிநாடுகளில் வசிக்கும் இந்துக்கள் பல்வேறு பிரச்சினைகளை எதிர்கொள்ள வேண்டியிருப்பதாகவும் அவர்கள் சாடியுள்ளனர். இதற்கிடையே அமெரிக்காவின் ஜார்ஜியா மாகாணம், இந்துபோபியாவைக் கண்டித்து ஒரு தீர்மானத்தை நிறைவேற்றியது... இந்துபோபியா குறித்து அமெரிக்கா மாகாணம் ஒன்று அதிகாரப்பூர்வமாக சட்டமியற்றுவது இதுவே முதல்முறையாகும்.

ஜார்ஜியா

அந்த மசோதாவில், "100க்கும் மேற்பட்ட நாடுகளில் 100 கோடிக்கும் அதிகமான மக்கள் பின்பற்றும் உலகின் மிகப்பெரிய மற்றும் பழமையான மதங்களில் ஒன்றாக இந்து மதம் இருக்கிறது. பரஸ்பர மரியாதை மற்றும் அமைதி, நம்பிக்கை ஆகியவற்றை உள்ளடக்கியதாக இந்து மதம் இருக்கிறது" என்று அதில் கூறப்பட்டுள்ளது. ஜார்ஜியாவில் இந்துக்கள் அதிகளவில் வாழும் அட்லாண்டா புறநகரில் உள்ள ஃபோர்சித் கவுண்டி பிரதிநிதிகள் லாரன் மெக்டொனால்ட் மற்றும் டோட் ஜோன்ஸ் ஆகியோர் இந்தத் தீர்மானத்தைக் கொண்டு வந்தனர்.

இந்துக்களின் பங்கு

மருத்துவம், அறிவியல் மற்றும் பொறியியல், ஐடி,நிதி, கல்வித்துறை, என பல்வேறு துறைகளில் அமெரிக்க- இந்து சமூகம் முக்கிய பங்காற்றுகிறதாக அதில் கூறப்பட்டுள்ளது. மேலும், யோகா, ஆயுர்வேதம், தியானம் ஆகியவற்றில் இந்துக்களின் பங்கால் பல லட்சம் அமெரிக்கர்களின் வாழ்க்கையை மேம்பட்டுள்ளதாகவும் அதில் கூறப்பட்டுள்ளது. இருப்பினும், அமெரிக்காவில் பல பகுதிகளில் கடந்த பல ஆண்டுகளாகவே இந்து-அமெரிக்கர்களுக்கு எதிரான வெறுப்பு குற்றங்கள் நடந்து வருவதாகவும் அந்த தீர்மானத்தில் கூறப்பட்டுள்ளது.

சட்டம்

இந்து மதம் சிதைக்கப்படுவதையும் இந்துக்களின் புனித நூல்களைச் சிலர் திட்டமிட்டுக் குற்றஞ்சாட்டுவதன் மூலம் இந்துபோபியா தீவிரமடைந்துள்ளதாகவும் அவர்கள் தெரிவித்துள்ளனர். இந்த தீர்மானம் ஜார்ஜியா சட்டசபையில் வெற்றிகரமாக நிறைவேற்றப்பட்டது. ஜார்ஜியா ஸ்டேட் கேபிட்டலில் மார்ச் 22ஆம் தேதி இது தொடர்பாகக் கூட்டம் ஒன்று நடைபெற்றது. அதில் அங்குப் பிரதானமாக இருக்கும் குடியரசு மற்றும் ஜனநாயகக் கட்சியைச் சேர்ந்த பிரதிநிதிகள் கலந்து கொண்டனர்.

பிரச்சினை

அதில் இந்து சமூகத்தினர் எதிர்கொள்ளும் சிக்கல்கள் குறித்து விளக்கப்பட்டது. அதைத் தொடர்ந்தே இப்போது தீர்மானத்தை இயற்றியுள்ளனர். இது குறித்து அங்கு வசிக்கும் இந்து அமெரிக்கச் சமூக நிர்வாகி ஒருவர் கூறுகையில், "ரெப் மெக்டொனால்ட் மற்றும் ரெப் ஜோன்ஸ் உள்ளிட்டோர் இணைந்து இந்த தீர்மானத்தை நிறைவேற்றி எங்கள் பிரச்சினைகளைப் புரிந்து கொள்ள முயன்றுள்ளனர்.. இந்து சமூகத்தை அவர்கள் எவ்வளவு மதிக்கிறார்கள் என்பதைக் காட்டும் ஒரு முன்மொழிவு தான் இது.

வெறுப்புணர்வு

ஜார்ஜியா மற்றும் நாட்டின் பிற பகுதிகளில் உள்ள இந்து அமெரிக்கர்கள் எதிர்கொள்ளும் பிரச்சனைகளை இது விளக்குகிறது. கடினமாக உழைத்து, சட்டத்தை மதித்து, அமெரிக்கப் பொருளாதாரத்தை உயர்த்த முயலும் இந்து சமூகத்தினர் குறித்த பொய்யான தகவல்களைப் பரப்பி வெறுப்புணர்வை ஏற்படுத்த சில முயல்கின்றனர். இதை நாம் தடுக்க வேண்டும். இதற்காகச் சிறப்புச் சட்டத்தையும் கொண்டு வர வேண்டும்" என்று அவர் தெரிவித்தார்.