உயிரை குடித்த புற்றுநோய்! நடிகர் சூப்பர் குட் சுப்பிரமணி காலமானார்! குடும்பம் கதறல்

சென்னை: புற்றுநோயால் பாதிக்கப்பட்டு சிகிச்சை பெற்று வந்த பிரபல குணச்சித்திர நடிகர் சூப்பர் குட் சுப்பிரமணி காலமானார். அவருக்கு வயது 58.

இயக்குநர்கள் சரவண சுப்பையா, பவித்ரன் ஆகியோரிடம் உதவி இயக்குநராக இருந்தவர் சூப்பர் குட் சுப்பிரமணி. இவர் இயக்குநராக முயற்சிகள் மேற்கொண்ட நிலையில் வாய்ப்புகள் ஏதும் கிடைக்காததால் நடிகராகிவிட்டார்.

பரியேறும் பெருமாள், காலா, பிசாசு, ரஜினிமுருகன், ஜெய்பீம் உள்ளிட்ட படங்களில் நடித்துள்ளார். இவர் பரமன் எனும் படத்தில் முதன்மை கதாபாத்திரத்தில் நடித்திருந்தார். சூப்பர் குட் பிலிம்ஸ் நிறுவனத்தில் பணிபுரிந்ததால் இவர் சூப்பர் குட் சுப்பிரமணி என அழைக்கப்பட்டு வந்தார்.

இவருக்கு திடீரென உடல்நலம் பாதிக்கப்பட்ட நிலையில் அவர் ராஜீவ் காந்தி அரசு மருத்துவமனையில் சிகிச்சைக்கு சேர்ந்தார். அப்போது அவருக்கு புற்றுநோய் இருப்பதாகவும் அது 4ஆவது கட்டம் என்றும் மருத்துவர்கள் தெரிவித்தனர். இதனால் சுப்பிரமணியின் குடும்பமே அதிர்ந்தது.

கடுமையான பொருளாதார நெருக்கடியில் இருப்பதால் புற்றுநோய் சிகிச்சைக்கு பண உதவி வேண்டும் என அவருடைய குடும்பத்தினர் கோரிக்கை விடுத்திருந்தனர். இந்த நிலையில் மருத்துவமனையில் இருந்து வீடு திரும்பிய சுப்பிரமணி, கமாண்டோவின் லவ் ஸ்டோரி எனும் படத்திற்கு டப்பிங் பேசி முடித்தார்.

பிறகு வீட்டில் ஓய்வு எடுத்துக் கொண்டிருந்த நிலையில் உடல்நிலை மோசமானது. இதையடுத்து அவர் ராஜீவ் காந்தி அரசு மருத்துவமனையில் அனுமதிக்கப்பட்டார். கடந்த ஒரு வாரமாக அவருக்கு சிகிச்சைகள் கொடுக்கப்பட்டன. ஐசியூவில் இருந்த நிலையில் புற்றுநோய் அவருடைய மூளை, உள்ளிட்ட உடல் உறுப்புகளில் பரவியதால் அவரை காப்பாற்ற முடியவில்லை. அவர் இறந்துவிட்டார்.

சுப்பிரமணிக்கு மனைவியும் 11 ஆம் வகுப்பு படிக்கும் மகளும் 9ஆம் வகுப்பு படிக்கும் மகனும் உள்ளனர். தற்போது சூப்பர் குட் சுப்பிரமணியின் உடல் சென்னை ராஜீவ் காந்தி அரசு மருத்துவமனையில் இருக்கிறது. இன்று இரவு மேற்கு மாம்பலத்தில் இருக்கும் அவரது இல்லத்திற்கு உடல் கொண்டு வரப்படுகிறது. அவருடைய இறுதிச் சடங்கு நாளை நடைபெறுகிறது. இவரது மறைவுக்கு திரைத்துறையினரும் ரசிகர்களும் இரங்கல் தெரிவித்து வருகிறார்கள்.

சுப்பிரமணிக்கு புற்றுநோய் என தெரியவந்ததும் அவரது குழந்தைகளின் படிப்புச் செலவை நடிகர் கார்த்தி ஏற்றுக் கொண்டதாக சொல்லப்படுகிறது.

English summary

Actor Super Good Subramani died of cancer. He is at 58.