“இது சிம்பதிக்காக சொல்லல… இதுதான் ரியாலிட்டி!”.. காளிதாஸ் 2 விழாவில் நடிகர் பரத் எமோஷனல்

சென்னை: தமிழ் சினிமாவில் தனக்கென ஒரு இடத்தை பிடித்த நடிகர்களில் ஒருவரான பரத், தற்போது நடித்துள்ள 'காளிதாஸ் 2' படம் மீண்டும் பேசுபொருளாகி வருகிறது. இந்த படத்தின் இசை வெளியீட்டு விழாவில் அவர் பேசிய விஷயங்கள் ரசிகர்கள் மத்தியில் கவனம் ஈர்த்துள்ளன.

2019ஆம் ஆண்டு வெளியான 'காளிதாஸ்' படம் நல்ல வரவேற்பைப் பெற்ற நிலையில், அதற்கான தொடர்ச்சியாக இந்த இரண்டாம் பாகம் உருவாகியுள்ளது. இந்த படத்தை இயக்குநர் ஸ்ரீ செந்தில் இயக்கியுள்ளார். இதில் பவானி ஸ்ரீ, சங்கீதா, அபர்ணதி உள்ளிட்ட பலரும் நடித்துள்ளனர்.

ஒரு நல்ல டைரக்டர் கிடைச்சா வாழ்க்கையே மாறும்

இசை வெளியீட்டு விழாவில் பரத் பேசும்போது தனது சினிமா பயணத்தை மிக நேர்மையாக பகிர்ந்துகொண்டார். அவர் கூறியதாவது: "என் கரியரில் நான் நிறைய புதுமுக இயக்குநர்களோட வேலை பண்ணிருக்கேன். அந்த அனுபவத்துல இருந்து நான் கற்றுக்கிட்ட முக்கியமான விஷயம் என்னனா... ஒரு நல்ல இயக்குநர் கிடைச்சா, உங்க சினிமா பயணம் ரொம்ப பெரிய அளவுக்கு திறந்து விடும். இல்லனா தான் பிரச்சனை."

அவரது இந்த பேச்சு, சினிமாவில் இயக்குநரின் முக்கியத்துவத்தை நேரடியாக எடுத்துக் காட்டியது.

மார்க்கெட் ரியாலிட்டி

பரத் தொடர்ந்து சினிமாவில் இருக்கும் ஏற்றத்தாழ்வுகள் மற்றும் வெளியே தெரியாத சில உண்மைகளைப் பற்றியும் வெளிப்படையாக பேசினார். "சினிமாவுல எல்லாருக்கும் வெற்றியும் தோல்வியும் இருக்கும். மூணு ஹிட் படம் கொடுத்தீங்கன்னா தலையில தூக்கி வச்சு கொண்டாடுவாங்க. அதே சமயம் ஒரு படம் தோல்வி அடைந்தா உடனே 'மார்க்கெட் இல்ல'ன்னு சொல்ல ஆரம்பிச்சிடுவாங்க."

இந்த வார்த்தைகள் ரசிகர்களிடையே பெரும் வரவேற்பைப் பெற்றதோடு, பலரும் அதை 'ரியாலிட்டி ஸ்பீச்' என்று பாராட்டி வருகின்றனர்.

காளிதாஸ் கம்பேக் படம்

தன் வாழ்க்கையில் ஒரு முக்கிய திருப்பமாக இருந்த படத்தைப் பற்றி பேசும்போது பரத் உணர்ச்சியுடன் கூறினார்: "நான் வாழ்க்கையில் பல சறுக்கல்களை சந்தித்து கொண்டு இருந்த சூழ்நிலையில் தான் எனக்கு 'காளிதாஸ்' கிடைச்சது. அது எனக்கு கம்பேக் படம். நான் சினிமாவை விட்டு போயிடல... இதே துறையில்தான் இருக்கணும் என்பதற்காக போராடி இருக்கேன்." என்று கூறினார்

இது சிம்பதிக்காக இல்ல

மேலும் அவர் பேசுகையில், "நான் சொல்றது சிம்பதிக்காக இல்ல... இதுதான் ரியாலிட்டி. நாம என்ன பண்ணாலும், நம்மோட கடைசி படம் தான் இங்க பிசினஸ் முடிவு பண்ணும்." என்று அவர் பேசிய ஒரு வரி தற்போது சமூக வலைதளங்களில் அதிகமாக பகிரப்பட்டு வருகிறது.

காளிதாஸ் 2 சிறிய படமாக தொடக்கம்

படத்தைப் பற்றியும் பரத் அவர் குறிப்பிட்டார்: "இந்த படத்தை நாங்க ரொம்ப சின்னதாகத் தொடங்கினோம். ஆனா இன்று இது பெரிய படமாக வளர்ந்திருக்கிறது. இப்போ நான் பல ஆடியோ லாஞ்ச் ரீல்ஸ்ல தான் பார்க்கிறேன். என் படங்களுக்கு அந்த அளவுக்கு விழாக்கள் நடந்தது கிடையாது." என்று அவர் எமோஷனலாக பேசியிருக்கிறார். இந்த பேச்சு, சினிமாவில் இருக்கும் மாற்றங்களையும் வெளிப்படுத்தியது.

நடிகர் பரத் பயணம்

பரத் தமிழ் சினிமாவில் 'பாய்ஸ்' படத்தின் மூலம் அறிமுகமானவர். அதன் பிறகு 'காதல்', 'எம் மகன்', 'வெயில்', 'பழனி' போன்ற படங்கள் மூலம் ரசிகர்களின் மனதில் இடம்பிடித்தார். ஒரு காலத்தில் முன்னணி ஹீரோவாக இருந்த அவர், பின்னர் சில தோல்விகளால் சற்று பின்னடைவை சந்தித்தாலும், தொடர்ந்து முயற்சி செய்து மீண்டும் களத்தில் நிற்கிறார்.

ரசிகர்கள் எதிர்பார்ப்பு

'காளிதாஸ்' படம் கொடுத்த வெற்றியை தொடர்ந்து, 'காளிதாஸ் 2' மீதும் நல்ல எதிர்பார்ப்பு உருவாகியுள்ளது. பரத்தின் இந்த நேர்மையான பேச்சும் படத்துக்கு ஒரு ப்ளஸ் ஆகி இருக்கிறது.

மொத்தத்தில், ஒரு நடிகர் தனது வாழ்க்கை அனுபவத்தையும், சினிமாவின் உண்மையையும் எவ்வித அலங்காரமும் இல்லாமல் சொல்லியிருக்கும் இந்த பேச்சு, தற்போது ரசிகர்கள் மத்தியில் பெரும் பேசுபொருளாக மாறியுள்ளது.

English summary

Actor Bharath spoke candidly at the audio launch of Kalidas 2, highlighting the importance of a good director in shaping an actor’s career. He shared his personal struggles, the ups and downs in the film industry, and how success and failure are often judged based on recent performances. His honest and emotional speech has resonated with fans and is now widely discussed on social media.