இந்தியாவில் முதல் முறை! சாமானிய நபருக்கு புனிதர் பட்டம்.. அடுத்த ஆண்டு போப் ஆண்டவர் வழங்குகிறார்!

திருவனந்தபுரம்: இந்து மதத்திலிருந்து கிறிஸ்துவத்திற்கு மதம் மாறிய 18 ஆவது நூற்றாண்டை சேர்ந்த இந்தியாவை சேர்ந்த ஒருவருக்கு அடுத்த ஆண்டு முதல்முறையாக புனிதர் பட்டத்தை போப் ஆண்டவர் வழங்குகிறார்.

இதுவரை கன்னியாஸ்திரிகள், பாதிரியார்கள், பிஷப் போன்றவர்களுக்கு மட்டுமே வழங்கப்பட்டு வந்த புனிதர் பட்டம் முதல்முறையாக இந்தியாவை சேர்ந்த சாதாரண நபருக்கு போப் ஆண்டவர் வழங்கவுள்ளார்.

தேவசகாயம் பிள்ளை உள்பட உலகளவில் 6 பேருக்கு மே 15 ஆம் தேதி 2022 ஆம் ஆண்டு வாடிகன் நகரில் புனித பீட்டர் தேவாலயத்தில் நடக்கும் நிகழ்ச்சி ஒன்றில் போப் ஆண்டவர் புனிதர் பட்டத்தை வழங்கவுள்ளார்.

இதற்கான முறையான அறிவிப்பை வாடிகனில் உள்ள புனிதர்கள் திருச்சபை கூட்டமைப்பு செவ்வாய்க்கிழமை வெளியிட்டுள்ளது. முதலில் யார் இந்த தேவசகாயம் பிள்ளை என்பதை பார்ப்போம். கடந்த 1712 ஆம் ஆண்டு ஏப்ரல் 23 ஆம் தேதி கன்னியாகுமரி மாவட்டம் நட்டாளத்தில் இந்துவாக நாடார் சமூகத்தில் பிறந்தார் தேவசகாயம் பிள்ளை.

இவர் கிறிஸ்துவ மதத்தின் போதனைகளை கேட்டறிந்து அந்த மதத்தின் மீது பற்றுக் கொண்டு 1745 ஆம் ஆண்டு கிறிஸ்துவ மதத்தில் இணைந்தார். தனது பெயரை லாசரஸ் என மாற்றிக் கொண்டார். தேவசகாயம் அல்லது லாசரஸ் என்ற பெயருக்கு கடவுளின் தூதுவர் அல்லது உதவியாளர் என்பது பொருளாகும்.

இவர் தனது சொற்பொழிவில் ஜாதி , மத பாகுபாடின்றி அனைவரும் சமம் என்பதை வலியுறுத்தி வந்தார். இது உயர் ஜாதியினரின் கோபத்திற்கு ஆளானது. இதையடுத்து அவர் 1749 ஆம் ஆண்டு கைது செய்யப்பட்டார். அதன்பின்னர் மிகவும் கஷ்டப்பட்ட அவர் 1752 ஆம் ஆண்டு ஜனவரி 14ஆம் தேதி சுட்டுக் கொல்லப்பட்டார். இந்த தகவலை வாட்டிகன் செய்திக் குறிப்பு கூறியுள்ளது.

தேவசகாயத்தின் வாழ்க்கை தொடர்பான காட்சிகள், இடங்கள் கன்னியாகுமரி மாவட்டத்தில் உள்ள கோட்டார் டயோசிஸுக்கு உள்பட்ட இடங்களில் உள்ளது. கடந்த 2012 ஆம் ஆண்டு அதாவது டிசம்பர் 2ஆம் தேதி சுமார் 300 ஆண்டுகளுக்கு பின்னர் தேவசகாயம் போப் ஆண்டவரால் ஆசிர்வதிக்கப்பட்டவராக அறிவிக்கப்பட்டுள்ளார். இந்த நிலையில் அடுத்த ஆண்டு புனிதராகவும் அறிவிக்கப்படுகிறார்.

English summary

Kerala's Devasahayam Pillai to be declared as sainthood by Pope.