மோடி கோபத்தை எல்லாம் சமாளிக்க முடியாது.. காங்கிரஸ் தயாராக இருந்தாலும்.. நோ சொல்ல போகும் விஜய்!

Updated: Tuesday, February 17, 2026, 9:15 [IST]

Subscribe to Oneindia Tamil

சென்னை: 2026 தமிழக சட்டமன்றத் தேர்தலுக்கான அரசியல் களம் சூடுபிடிக்கத் தொடங்கியுள்ளது. ஒருபுறம் காங்கிரஸ் கட்சி, தமிழக வெற்றிக் கழகத்துடன் (தவெக) கூட்டணி அமைப்பது குறித்து ரகசிய சிக்னல்களை அனுப்பி வருகிறது.

ஆனால், நடிகர் விஜய் இந்த அழைப்பை ஏற்கத் தயங்குவதாக அரசியல் நோக்கர்கள் கருதுகின்றனர். காங்கிரஸுடன் கைகோர்ப்பது ஒரு 'மதச்சார்பற்ற' பிம்பத்தைத் தந்தாலும், டெல்லியின் அதிகார மையமான பிரதமர் நரேந்திர மோடியின் கோபத்திற்கு ஆளாக விஜய் விரும்பவில்லை என்பதே தற்போதைய கள நிலவரமாகத் தெரிகிறது.

tamil nadu assembly elections 2026 dmk aiadmk

மத்திய முகமைகளின் பிடியில் தவெக?

காங்கிரஸ் கட்சியின் கூட்டணி அழைப்பை விஜய் ஏற்றுக்கொள்வாரா என்பது மிகப்பெரிய கேள்விக்குறியாகவே உள்ளது. இதற்குப் பின்னால் இருக்கும் மிக முக்கியக் காரணமாகப் பார்க்கப்படுவது பிரதமர் நரேந்திர மோடியின் கோபத்திற்கு ஆளாக விஜய் விரும்பவில்லை என்பதுதான்.

பாஜகவைப் பொறுத்தவரை, மாநிலக் கட்சிகள் காங்கிரஸுடன் கைகோர்த்து அதற்குப் புத்துயிர் அளிப்பதை டெல்லி தலைமை துளியும் விரும்புவதில்லை. விஜய்யின் அரசியல் நகர்வுகள் ஆரம்பத்திலிருந்தே திராவிடக் கட்சிகளுக்கு மாற்றாக ஒரு 'மூன்றாவது சக்தியாக' உருவெடுப்பதையே குறிவைக்கின்றன. இந்நிலையில், காங்கிரஸுடன் கூட்டணி வைப்பது என்பது நேரடியாக மோடியின் தேசிய அரசியலுக்கு எதிரான போர்க்கொடியைத் தூக்குவதற்குச் சமம். தமிழகத்தில் தனது அரசியல் பயணத்தை இப்போதுதான் தொடங்கியுள்ள விஜய், ஆரம்பத்திலேயே மத்திய அரசின் நேரடிப் பகையைச் சம்பாதித்துக்கொள்வது தற்கொலைக்குச் சமமான ஒரு முடிவாக இருக்கும் என அவரது ஆலோசகர்கள் கருதுகின்றனர்.

விஜய்க்கு எதிரான சட்டச் சிக்கல்கள்

மேலும், விஜய்க்கு எதிரான சட்டச் சிக்கல்கள் அவரைப் பின்வாங்கச் செய்யும் மற்றொரு பலமான காரணியாகும். ஏற்கனவே விஜய்க்குச் சொந்தமான இடங்களில் வருமான வரித் துறையினர் நடத்திய சோதனைகள் மற்றும் அவர் மீது நிலுவையில் உள்ள பழைய வரி ஏய்ப்பு வழக்குகள் அவருக்கு ஒருவித அழுத்தத்தைக் கொடுத்து வருகின்றன. குறிப்பாக, அண்மையில் 1.5 கோடி ரூபாய் அபராதம் தொடர்பான வழக்கில் நீதிமன்றத்தின் தீர்ப்பு அவருக்குச் சாதகமாக இல்லை. இது தவிர, கரூர் மாநாட்டின் போது ஏற்பட்ட கூட்ட நெரிசலில் ஏற்பட்ட உயிரிழப்புகள் தொடர்பாக சிபிஐ (CBI) விசாரணை மேற்கொண்டு வருவது விஜய்க்குப் பெரும் தலைவலியை ஏற்படுத்தியுள்ளது.

சிபிஐ மற்றும் வருமான வரித் துறை கோபம்

இத்தகைய சூழலில், காங்கிரஸுடன் கூட்டணி வைத்தால் மத்திய அரசின் கட்டுப்பாட்டில் உள்ள சிபிஐ மற்றும் வருமான வரித் துறை போன்ற அமைப்புகள் தவெக மீது இன்னும் தீவிரமான பாய்ச்சலை நிகழ்த்தக்கூடும் என்ற அச்சம் கட்சி வட்டாரத்தில் நிலவுகிறது. காங்கிரஸைத் தள்ளி வைப்பதன் மூலம், மத்திய அரசின் நேரடித் தாக்குதலில் இருந்து ஓரளவுக்குத் தப்பித்துக் கொள்ளலாம் என்பது விஜய்யின் கணக்காக இருக்கலாம். எனவே, காங்கிரஸ் கட்சி சிவப்புக் கம்பளம் விரித்து அழைத்தாலும், தனது அரசியல் எதிர்காலத்தையும் தனிப்பட்ட பாதுகாப்பையும் கருதி விஜய் "வேண்டாம்" என்று சொல்வதற்கே அதிக வாய்ப்புகள் உள்ளன.

விஜய்யின் இந்த அமைதி மற்றும் கூட்டணிக் குறித்த தயக்கம், அவர் தமிழக அரசியலில் ஒரு தனிப் பாதையை உருவாக்க விரும்புவதையே காட்டுகிறது. தேசியக் கட்சிகளின் நிழலில் வளருவதை விட, தனது சொந்த பலத்தில் நின்று மோதிப் பார்ப்பதே சிறந்தது என அவர் முடிவெடுத்திருக்கலாம். எது எப்படியிருப்பினும், 2026 தேர்தல் நெருங்கும் போதுதான் விஜய்யின் இந்த அரசியல் வியூகம் அவருக்கு வெற்றியைத் தருமா அல்லது பின்னடைவை ஏற்படுத்துமா என்பது தெரியவரும்.வேண்டும்.