அதுக்குள்ளவா? சென்னைக்கு வந்த புது அலர்ட்.. அடுத்த 48 மணிநேரம் முக்கியம்! இடி மின்னலோடு மழை வாய்ப்பு

சென்னை: மிக்ஜாம் புயல் வெள்ளத்தால் சென்னை அதிகமாக பாதிக்கப்பட்டது. தற்போது பல இடங்களில் வெள்ளம் வடிந்துள்ள நிலையில் அடுத்த 48 மணிநேரத்தில் சென்னையில் இடி மின்னலுடன் மழை பெய்ய வாய்ப்பு இருப்பதாக வானிலை ஆய்வு மையம் தெரிவித்துள்ளது.

வங்கக்கடலில் மிக்ஜாம் புயல் உருவானது. இதனால் சென்னையில் கடந்த 3ம் தேதி முதல் 4ம் தேதி வரை இடைவிடாது கனமழை கொட்டித்தீர்த்தது. இதனால் சென்னை முழுவதும் தண்ணீரில் மூழ்கியது. விடியவிடிய கொட்டிய கனமழையால் சாலைகளில் மழை நீர் வெள்ளமாக ஓடியது.

குடியிருப்புகளை வெள்ளம் சூழ்ந்ததால் மக்களின் இயல்பு வாழ்க்கையும் பாதிக்கப்பட்டது. அதன்பிறகு கடந்த 5ம் தேதி முதல் மழை என்பது சென்னையில் பெய்யாத நிலையில் மீட்பு பணி என்பது தீவிரமாக நடந்தது. இதனால் தற்போது சென்னையில் வெள்ளம் பாதித்த பெரும்பாலான இடங்களில் மக்கள் இயல்பு வாழ்க்கைக்கு திரும்பி உள்ளனர்.

இருப்பினும் கூட இன்னும் சில இடங்களில் மழை வெள்ளம் என்பது முழுவதுமாக வடியவில்லை. அந்த இடங்களில் தண்ணீரை அகற்றும் பணி தொடர்ந்து நடந்து வருகிறது. சென்னையில் மழை இல்லாவிட்டால் விரைவில் தண்ணீர் அகற்றப்பட்டு 100 சதவீதம் இயல்பு வாழ்க்கை திரும்பிவிடும். ஆனால் மழை பெய்தால் மீண்டும் தண்ணீர் தேங்க வாய்ப்புள்ளது.

இந்நிலையில் தான் சென்னையில் அடுத்த 48 மணி நேரத்துக்கான வானிலை நிலவரம் எப்படி இருக்கும் என்பது பற்றி சென்னை வானிலை ஆய்வு மையம் கணித்து கூறியுள்ளது. இதுதொடர்பாக இன்று மதியம் 12.30 மணிக்கு சென்னை வானிலை ஆய்வு மையம் வெளியிட்டுள்ள செய்திக்குறிப்பில் கூறப்பட்டுள்ளதாவது:

தென்கிழக்கு அரபிக்கடல் மற்றும் அதனையொட்டி மாலத்தீவு பகுதிகளில் வளிமண்டல கீழடுக்கு சுழற்சி நிலவுகிறது. இது அடுத்த 24 மணிநேரத்தில் அதே பகுதியில் காற்றழுத்த தாழ்வு பகுதியாக நிலவக்கூடும். இதனால் தமிழகத்தில் இன்று நீலகிரி, கோவை, ஈரோடு, திருப்பூர், திண்டுக்கல், தேனி, மதுரை, விருதுநகர், தென்காசி, நெல்லை, குமரி, தூத்துக்குடி, ராமநாதபுரம், சிவகங்கை, புதுக்கோட்டை, தஞ்சாவூரில் கனமழை பெய்ய வாய்ப்புள்ளதாக தெரிவிக்கப்பட்டுள்ளது.

அதோடு சென்னை மற்றும் புறநகர் பகுதிகளில் வானம் ஓரளவு மேகமூட்டத்துடன் காணப்படும். நகரின் ஒரு சில பகுதிகளில் இடி, மின்னலுடன் கூடிய லேசானது முதல் மிதமான மழை பெய்யக்கூடும். அதிகபட்ச வெப்பநிலை என்பது 32 டிகிரி செல்சியஸாகவும், குறைந்தபட்ச வெப்பநிலை என்பது 25 டிகிரி செல்சியஸாகவும் இருக்கும் என கூறப்பட்டுள்ளது. தற்போது தான் சென்னையில் மழை வெள்ளம் என்பது வடிந்து வரும் நிலையில் அடுத்த 48 மணிநேரத்தில் இடி மின்னலுடன் லேசானது முதல் மிதமான மழை பெய்யும் என வானிலை மையம் தெரிவித்துள்ளது என்பது குறிப்பிடத்தக்கது.

English summary

Chennai was hit the hardest by the Michaung Cyclone. At present, the flood has receded in many places and there is a possibility of thunder and lightning rain in Chennai in the next 48 hours, according to the Meteorological Department.