எங்கே பார்த்தாலும் மழை.. சென்னையை மொத்தமாக நனைத்த மழை! 22 விமானங்கள் புறப்படுவதில் தாமதம்

Updated: Wednesday, November 22, 2023, 16:36 [IST]

Subscribe to Oneindia Tamil

சென்னை: தமிழ்நாடு முழுவதும் பரவலாக தொடர் மழை பெய்து வரும் நிலையில், சென்னையிலிருந்து செல்லும் விமானங்கள் தாமதமாக புறப்பட்டு செல்கின்றன. 22 விமானங்கள் தாமதமாக புறப்பட்டு செல்லும் என தெரிவிக்கப்பட்டிருக்கிறது.

குமரிக்கடல், தமிழக கடலோரப்பகுதிகள் மற்றும் அதனை ஒட்டிய தென்மேற்கு - மத்தியமேற்கு வங்கக்கடல் பகுதிகளில் வளிமண்டல கீழடுக்கு சுழற்சி நிலவுவதால், இன்று தமிழகத்தில் அநேக இடங்களிலும், புதுவை மற்றும் காரைக்கால் பகுதிகளிலும் இடி மின்னலுடன் கூடிய லேசானது முதல் மிதமான மழை பெய்யக்கூடும் என வானிலை ஆய்வு மையம் தெரிவித்திருக்கிறது.

Due to incessant rains, flights from Chennai are delayed

சென்னையில் கடந்த 2 நாட்களாக தொடர்ந்து மழை பெய்து வருகிறது. எனவே சென்னையிலிருந்து 22 விமானங்கள் புறப்படுவதில் தாமதம் ஏற்பட்டிருக்கிறது. பயணிகளின் தாமதமான வருகை, உடமைகளை ஏற்றுவதில் ஏற்பட்டுள்ள தாமதம் காரணமாக விமானங்கள் புறப்படுவதிலும் தாமதம் ஏற்பட்டிருக்கிறது. எனவே வெளிநாடுகளுக்கு செல்லும் 12 விமானங்கள் மற்றும் 10 உள்நாட்டு விமானங்கள் தாமதமாக புறப்படுகின்றன. 20 நிமிடங்கள் முதல் 1 மணி வரை விமானங்கள் தாமதமாக புறப்பட இருக்கின்றன. குறிப்பாக சென்னையில் இருந்து தூத்துக்குடி செல்லும் விமான சேவை ரத்து செய்யப்பட்டுள்ளது.

மழையை பொறுத்த அளவில் கன்னியாகுமரி, திருநெல்வேலி மற்றும் தென்காசி மாவட்டங்களில் ஓரிரு இடங்களில் கன முதல் மிக கனமழையும், தூத்துக்குடி, இராமநாதபுரம், தேனி, திண்டுக்கல், புதுக்கோட்டை, தஞ்சாவூர், திருவாரூர், நாகப்பட்டினம், மயிலாடுதுறை மாவட்டங்கள் மற்றும் காரைக்கால் பகுதிகளில் ஓரிரு இடங்களில் கனமழையும் பெய்ய வாய்ப்புள்ளதாக வானிலை ஆய்வு மையம் தெரிவித்திருக்கிறது.

மேலும் நாளை, தமிழகத்தில் அநேக இடங்களிலும், புதுவை மற்றும் காரைக்கால் பகுதிகளிலும் இடி மின்னலுடன் கூடிய லேசானது முதல் மிதமான மழை பெய்யக்கூடும். நீலகிரி, கோயம்புத்தூர், திருப்பூர், தேனி மற்றும் திண்டுக்கல் மாவட்டங்களில் ஓரிரு இடங்களில் கனமழை பெய்ய வாய்ப்புள்ளது. 24ம் தேதியை பொறுத்த அளவில் தமிழகத்தில் அநேக இடங்களிலும், புதுவை மற்றும் காரைக்கால் பகுதிகளிலும் இடி மின்னலுடன் கூடிய லேசானது முதல் மிதமான மழை பெய்யக்கூடும். 25 மற்றும் 27ம் தேதி வரை தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக்கூடும் என வானிலை ஆய்வு மையம் தெரிவித்துள்ளது என்பது குறிப்பிடத்தக்கது.