இடி மின்னலுடன் 6 மாவட்டங்களில் கனமழை... உதகையில் வாட்டும் குளிர்..சென்னைவாசிகளுக்கும் குட் நியூஸ்!

சென்னை: தமிழ்நாட்டில் பல ஊர்களில் கனமழை பெய்து வரும் நிலையில் நீலகிரி மாவட்டத்தில் கடும் குளிர்காலம் போல பருவநிலை மாறியுள்ளதாக மக்கள் உணரத் தொடங்கியுள்ளனர். இன்றைய தினம் 6 மாவட்டங்களில் கனமழை பெய்ய வாய்ப்பு உள்ளதாக கூறியுள்ள வானிலை ஆய்வு மையம், சென்னையில் பகல் நேரங்களில் வெயில் சுட்டெரிக்கும் எனவும் இரவில் மிதமான மழைக்கு வாய்ப்பு உள்ளதாகவும் தெரிவித்துள்ளது.

தென்மேற்குப் பருவமழை இன்னும் சில நாட்களில் விடைபெறப்போகிறது. வடகிழக்கு பருவமழை தொடங்க உள்ளது. தமிழ்நாட்டில் பல ஊர்களில் கனமழையும் பெய்து வருகிறது. நீலகிரி மாவட்டம், உதகை மற்றும் அதன் சுற்றுவட்டாரப் பகுதிகளில், கடந்த சில நாட்களாக அவ்வப்போது மிதமான மழையும், சாரல் மழையும் பெய்து வந்தது. மேகமூட்டத்துடன் ரம்யமான காலநிலை நிலவி வந்தது.இந்நிலையில் ஒரு மணி நேரத்திற்கும் மேலாக கனமழை கொட்டித் தீர்த்தது.

மழையால் நீலகிரி மாவட்டத்தில் மலைத்தோட்டங்களில் காய்கனிகள் பயிரிட்டுள்ள விவசாயிகள் மகிழ்ச்சியடைந்துள்ளனர். அதே நேரத்தில், சேரிங் கிராஸ், படகு இல்லம், மத்தியப் பேருந்து நிலையம், பிங்கர் போஸ்ட், காந்தள், தலைக்குந்தா உள்ளிட்ட பகுதிகளில் கடுங்குளிர் நிலவுவதால் பொதுமக்கள் சிரமத்திற்கு ஆளாகியுள்ளனர்.

இதனிடையே வானிலை ஆய்வு மையம் வெளியிட்டுள்ள அறிவிப்பில், தென் தமிழகம் மற்றும் அதனை ஒட்டிய பகுதிகளின் மேல் நிலவும் வளிமண்டல மேலடுக்கு சுழற்சி காரணமாக இன்று தமிழ்நாடு, புதுச்சேரி மற்றும் காரைக்கால் பகுதிகளில் ஒருசில இடங்களில் மின்னலுடன் கூடிய லேசானது முதல் மிதமான மழை பெய்யக்கூடும். நீலகிரி, ஈரோடு, சேலம், தர்மபுரி, கிருஷ்ணகிரி மற்றும் திருப்பத்தூர் மாவட்டங்களில் ஓரிரு இடங்களில் கனமழை பெய்ய வாய்ப்புள்ளது.

நாளை முதல் 28ஆம் தேதி வரைக்கும் தமிழ்நாடு, புதுச்சேரி மற்றும் காரைக்கால் பகுதிகளில் ஒருசில இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும் என தெரிவிக்கப்பட்டுள்ளது.

சென்னை மற்றும் அதன் புறநகர் பகுதிகளை பொறுத்தவரை அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி மின்னலுடன் கூடிய லேசான/மிதமான மழை பெய்யக்கூடும். அதிகபட்ச வெப்பநிலை 35-36 டிகிரி செல்சியஸ் மற்றும் குறைந்தபட்ச வெப்பநிலை 27-28 டிகிரி செல்சியஸை ஒட்டியும் இருக்கக்கூடும்.

English summary

As heavy rains are falling in many towns in Tamil Nadu, people have started to feel that the weather has changed like severe winter in the Nilgiris district. The Meteorological Department has said that there is a possibility of heavy rain in 6 districts today. Chennai will be hot during the day and there is a possibility of moderate rain at night.