123 ஆண்டுகளில் இல்லாத அளவுக்கு 2024 இல் வெப்பம்! இந்திய வானிலை மையம் அதிர்ச்சி தகவல்

டெல்லி: இந்தியாவில் கடந்த 123 ஆண்டுகளில் இல்லாத வெப்பம், 2024 ஆம் ஆண்டு பதிவாகியுள்ளதாக இந்திய வானிலை மையம் தெரிவித்துள்ளது.

2024 ஆம் ஆண்டு முடிந்து 2025 ஆம் ஆண்டு பிறந்துள்ளது. இந்த நிலையில் கடந்த ஆண்டு வெயில் எப்படி இருந்தது என்பது குறித்து இந்திய வானிலை ஆய்வு மையத்தின் இயக்குநர் ஜெனரல் மிருத்யுஞ்சய் மொஹபத்ரா விவரித்துள்ளார்.

இதுகுறித்து அவர் கூறியிருப்பதாவது: இந்தியாவில் 1901 ஆம் ஆண்டு முதல் 2024 ஆம் ஆண்டு வரையிலான பதிவுகளின் அடிப்படையில் தற்போது விடைப்பெற்ற 2024 ஆம் ஆண்டுதான் அதிகப்படியான வெப்பம் பதிவாகியுள்ளது.

கடந்தாண்டு வெப்பநிலை, இயல்பை விட 0.54 டிகிரி செல்சியஸ் அதிகமாக இருந்தது. சராசரி குறைந்தபட்ச வெப்பநிலை என்பது 0.90 டிகிரியாக உள்ளது. ஐரோப்பிய வானிலை மையத்தின் தகவலின்படி கடந்த ஆண்டு வெப்பநிலை அதிகமாக பதிவாகியுள்ளது. 2024 ஆம் ஆண்டு உலகிலேயே 41 நாட்கள் மிக ஆபத்தான வெப்பம் இருந்தது. உலகில் சராசரியாக வெப்பநிலை 1.5 டிகிரி செல்சியஸ் என்ற மைல்கல்லை எட்டிய முதல் ஆண்டு இதுவாகும்.

கடந்த 2016 ஆம் ஆண்டு பதிவாகியிருந்த வெப்பநிலையை 2024 ஆம் ஆண்டு பதிவானது முறியடித்துள்ளது. உலகம் முழுவதுமே அதிக அளவு வெப்பம் பதிவான நாட்கள் அதிகமாகவே உள்ளன என தெரிவித்திருந்தார். இது காலநிலை மாற்றத்தின் காரணமாக நிகழ்ந்திருக்கலாம் என தெரிகிறது.

உலகம் முழுவதுமே 2024 ஆம் ஆண்டு 219 மோசமான பருவநிலை நிகழ்வுகள் நடைபெற்றுள்ளன. இதில் 26 நிகழ்வுகளில் 3,700 பேர் உயிரிழந்தது மட்டுமில்லாமல் லட்சக்கணக்கானோர் புலம் பெயர்ந்துள்ளனர். அதீத வெப்பம், பஞ்சம், புயல்கள், அதீத மழை ஆகியவற்றுக்கு காலநிலை மாற்றமே காரணம் என சொல்லப்படுகிறது. இந்த நிலை மேலும் மோசமடையும் என எச்சரிக்கைகள் விடுக்கப்பட்டுள்ளது.

English summary

Indian Meteorological Department says that the year 2024 was the warmest on record in India since 1901.