புதிய காற்றழுத்த தாழ்வு பகுதி.. தமிழகத்திற்கு பாதிப்பா? சென்னை வானிலை மைய இயக்குநர் விளக்கம்

சென்னை: தமிழகத்தில் கடந்த சில நாட்களாக கோடை மழை பெய்து வருகிறது. இந்நிலையில், புதிய காற்றழுத்த தாழ்வு பகுதி உருவாக வாய்ப்பு இருப்பதாக வானிலை மையம் தெரிவித்திருக்கிறது. இதனால் தமிழ்நாட்டில் மழைக்கு வாய்ப்பு உள்ளதா? என்பது குறித்து சென்னை வானிலை மைய இயக்குநர் செந்தாமரைக்கண்ணன் விளக்கமளித்துள்ளார்.

இது தொடர்பாக அவர் வெளியிட்டிருக்கும் வீடியோவில், "வடக்கடலோர கர்நாடகா பகுதிகளை ஒட்டிய மத்திய கிழக்கு அரபிக் கடல் பகுதிகளில் இன்று காலை வளிமண்டல மேலடுக்கு சுழற்சி உருவாகி உள்ளது. இதன் காரணமாக அடுத்த 12 மணி நேரத்தில் அதே இடத்தில் காற்றழுத்த தாழ்வு பகுதி உருவாக கூடும்.

இது வட திசையில் நகர்ந்து அதற்கு அடுத்த 36 மணி நேரத்தில் புதிய காற்றழுத்த தாழ்வு மண்டலமாக வலுப்பெற கூடும். இந்த காற்றழுத்த தாழ்வு மண்டலத்தால் தமிழகத்திற்கு நேரடி பாதிப்புகள் இல்லை என்றாலும், கடந்த சில நாட்களாக பெய்து வரும் பரவலான மழை அடுத்த மூன்று நாட்களுக்கு ஒரு அளவுக்கு குறைய கூடும்.

நடப்பு தென்மேற்கு பருவ மழையானது அடுத்த மூன்று முதல் நான்கு நாட்களில் கேரளாவில் தொடங்கும். தெற்கு அரபிக்கடல் பகுதிகளான கச்சத்தீவு மாலத்தீவு கடல் பகுதிகள் மற்றும் தமிழக கடற் பகுதிகள், மத்திய வங்க கடல் பகுதிகள் மற்றும் வட கிழக்கு மாநிலங்களின் சில பகுதிகள் வரை மழை முன்னேறி செல்வதற்கான சாத்திய கூறுகள் தெரிகிறது.

தமிழக வானிலையைப் பொறுத்தவரை நேற்று அதிகபட்சமாக ராணிப்பேட்டை மாவட்டம் ஆற்காடு 15 சென்டிமீட்டர் மழை பதிவாகியுள்ளது. அடுத்த 24 மணி நேரத்தில் ஒரு சில இடங்களில் மழை பெய்ய வாய்ப்பு இருக்கிறது. வானிலை முன்னறிவிப்பை பொறுத்தவரை தமிழக மற்றும் காரைக்கால் பகுதிகளில் அடுத்து வரும் மூன்று நாட்களுக்கு சில் இடங்களில் லேசானது முதல் மிதமான மழை பெய்ய வாய்ப்பு உள்ளது.

கனமழையை பொருத்தவரை அடுத்த 24 மணி நேரத்தில் நீலகிரி, தர்மபுரி, கிருஷ்ணகிரி, திருப்பத்தூர், வேலூர் மற்றும் ராணிப்பேட்டை உள்ளிட்ட மாவட்டங்களில் கனமழைக்கும் வாய்ப்புள்ளது. அடுத்து வரும் மூன்று நாட்களுக்கு ஒரு சில இடங்களில் படிப்படியாக 2 முதல் 3 செல்சியஸ் வரை வெயில் அதிகரிக்க வாய்ப்புள்ளது.

சென்னை மற்றும் புறநகர் பகுதிகளில் அடுத்த 24 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஒரு சில பகுதிகளில் இடியுடன் கூடிய லேசானது முதல் மிதமான மழைக்கு வாய்ப்புள்ளது" என்று கூறியுள்ளார்.

English summary

Tamil Nadu has been experiencing summer rains for the past few days. In this situation, the weather center has reported the possibility of a new low-pressure area forming. In this context, Chennai Meteorological Center Director Senthamaraikannan has given an explanation regarding whether there is a chance of rain in Tamil Nadu.