இந்த நம்பரை நோட் பண்ணிக்கோங்க! கொட்டி தீர்க்கும் கனமழை.. அவசர உதவி எண்களை அறிவித்த சென்னை மாநகராட்சி
சென்னை: சென்னையில் கனமழை விடாது கொட்டி வரும் நிலையில் மழை தொடர்பான புகார்களுக்கு உதவி எண்களை அறிவித்துள்ளது சென்னை மாநகராட்சி.
தென்கிழக்கு வங்கக்கடல் பகுதிகளில் நிலவும் ஆழ்ந்த காற்றழுத்த தாழ்வுப் பகுதி காரணமாகவும், வடகிழக்குப் பருவமழை காரணமாகவும் தமிழகத்தின் பல்வேறு பகுதிகளில் கனமழை வெளுத்து வாங்கி வருகிறது. தமிழகத்தின் பெரும்பாலான பகுதிகளில் மழை பெய்துள்ளது. சென்னையின் பல்வேறு பகுதிகளில் மழை வெளுத்து வாங்கி வருகிறது. சென்னை உட்பட 25 மாவட்டங்களில் இரவு 10 மணி வரை மழை தொடரும் என வானிலை ஆய்வு மையம் தெரிவித்தது.
சென்னை மற்றும் அதனைச் சுற்றியுள்ள செங்கல்பட்டு, காஞ்சிபுரம் மற்றும் திருவள்ளூர் மாவட்டங்களில், தொடர்ந்து கனமழை பெய்து வருகிறது. சென்னையில் இன்று மாலை தொடங்கிய கனமழை விடாமல் வெளுத்து வாங்கியது. சென்னை, செங்கல்பட்டு, காஞ்சிபுரம், திருவள்ளூர் மாவட்டங்களில் நாளை காலை 8.30 மணி வரை மிக கனமழை பெய்யக்கூடும் என வானிலை ஆய்வு மையம் எச்சரிக்கை விடுத்துள்ளது.
சென்னை நகர் முழுவதும் கனமழை நீடிக்கும் நிலையில் களப்பணியாளர்கள் நிவாரணப் பணிகளை மேற்கொள்ள சென்னை மாநகராட்சி ஆணையர் ராதாகிருஷ்ணன் உத்தரவிட்டுள்ளார். மழை நீடிப்பதால் வீடுகளில் வீடுகளில் இருந்து பொதுமக்கள் வெளியே வர வேண்டாம் எனவும் அறிவுறுத்தி உள்ளார்.
இந்நிலையில், சென்னையில் மழை நீரால் பாதிக்கப்பட்டவர்கள் தொடர்பு கொள்ளும் வகையில், 1913 என்ற இலவச உதவி எண்ணை அறிவித்துள்ளது சென்னை மாநகராட்சி. இந்த எண்ணில் தொடர்பு கொண்டு பாதிக்கப்பட்ட மக்கள் தங்கள் புகார்களை பதிவு செய்யலாம். 044 25619204, 044 25619206, 044 25619207, ஆகிய எண்களிலும் தொடர்பு கொள்ளலாம் என அறிவிக்கப்பட்டுள்ளது.
இதுதவிர வாட்ஸ் அப் வாயிலாக 94454 77205 என்ற எண்ணில் தொடர்பு கொள்ளலாம் என்றும் சென்னை மாநகராட்சி நிர்வாகம் அறிவித்துள்ளது. உங்களுக்குச் சேவை செய்ய நாங்கள் இருக்கிறோம் என சென்னை மாநகராட்சி நிர்வாகம், சென்னை வாழ் மக்களுக்கு நம்பிக்கை தெரிவித்துள்ளது.
Click it and Unblock the Notifications
Sign in with Google