ஊட்டி மாதிரி மாறப்போகும் சென்னை.. வானிலையில் நடந்த மேஜிக்! வெதர்மேன் சொன்ன குட் நியூஸ்!

Updated: Saturday, May 9, 2026, 11:17 [IST]

Subscribe to Oneindia Tamil

சென்னை: தமிழகத்தில் கடந்த சில நாட்களாக வெயிலின் தாக்கம் அதிகரித்திருந்தது. இந்நிலையில் தற்போது மழை தொடங்கியிருக்கிறது. குறிப்பாக சென்னையில் மழையின் தாக்கம் இருக்கும் என்றும், இதன் காரணமாக வெப்பநிலை பரவலாக குறையும் என்றும் தமிழ்நாடு வெதர்மேன் பிரதீப் ஜான் கூறியுள்ளார்.

இது குறித்து தனது x பக்கத்தில் அவர் பதிவிட்டிருப்பதாவது, "சென்னை நகரை நோக்கி மேலும் பல மேகங்கள் நகர்ந்து வருகின்றன. கடும் கத்திரி வெயில் காலத்தின் உச்சத்தில் கூட சென்னையின் வெப்பநிலை 26 முதல் 27 டிகிரி செல்சியஸாக உள்ளது. இது நம் அனைவருக்கும் ஒரு கனவு போன்ற நாள்!

சென்னை மட்டுமல்லாமல், தமிழ்நாட்டின் பெரும்பாலான பகுதிகளிலும் மழை பெய்வதற்கான வாய்ப்புகள் உள்ளன. டெல்டா பகுதிகள் முதல் தென் தமிழ்நாடு வரையிலான இடங்களில் கனமழை பெய்வதற்கான வாய்ப்புகளும் காணப்படுகின்றன" என்று கூறியிருக்கிறார்.

பொதுவாக மே மாதத்தில் சென்னையின் வெப்பநிலை 40°C-ஐத் தாண்டி கொளுத்தும். ஆனால், தற்போது வங்கக்கடலில் நிலவும் வளிமண்டல மேலடுக்கு சுழற்சி மற்றும் கிழக்கு திசை காற்றின் வேக மாறுபாடு காரணமாக, மேகமூட்டம் அதிகரித்துள்ளது. இது சூரியக் கதிர்கள் நேரடியாகத் தரையைத் தாக்காமல் தடுத்து, வெப்பநிலையை பெருமளவு குறைத்துள்ளது.

சென்னை மட்டுமல்லாமல், தமிழகத்தின் பல பகுதிகளிலும் இன்று மழைக்கு வாய்ப்புள்ளதாக வானிலை ஆய்வு மையம் தெரிவித்துள்ளது. சென்னை & புறநகர்: தொடர்ந்து மேகமூட்டத்துடன் காணப்படும். அவ்வப்போது லேசானது முதல் மிதமான மழை பெய்யக்கூடும்.

டெல்டா மாவட்டங்கள்: தஞ்சாவூர், திருவாரூர், நாகப்பட்டினம் பகுதிகளில் ஓரிரு இடங்களில் கனமழை பெய்ய வாய்ப்புள்ளது.

தென் தமிழகம்: கன்னியாகுமரி, திருநெல்வேலி, தென்காசி மற்றும் தூத்துக்குடி மாவட்டங்களில் இடி மின்னலுடன் கூடிய கனமழைக்கு வாய்ப்பு அதிகம்.

முன்னதாக சென்னை வானிலை ஆய்வு மையம் அடுத்த 3 மணி நேரத்திற்கான வானிலை நிலவரத்தை வெளியிட்டிருந்தது. அதில், மதியம் 1 மணி வரை, சென்னை, திருவள்ளூர், செங்கல்பட்டு மற்றும் காஞ்சிபுரம் மாவட்டங்களில் இடி, மின்னலுடன் மிதமான மழை பெய்யும் என்று தெரிவித்திருக்கிறது.

அதேபோல விழுப்புரம், மயிலாடுதுறை, கடலூர், புதுக்கோட்டை, கடலூர், நாகப்பட்டினம், திருவாரூர், தஞ்சாவூர், ராமநாதபுரம், தூத்துக்குடி மாவட்டங்கிளில் ஒரு சில இடங்களில் இடி, மின்னலுடன் லேசான மழையும், கன்னியாகுமரி, திருநெல்வேலி, தென்காசி, கோவையில் லேசான மழைக்கும் வாய்ப்பு இருப்பதாக சென்னை வானிலை ஆய்வு மையம் தெரிவித்திருக்கிறது.