தவெகவுக்கு ஆதரவு இல்லை : இந்திய யூனியன் முஸ்லீம் லீக் கட்சி திடீர் மறுப்பு.. விஜய்க்கு சிக்கல்?
சென்னை: தவெகவுக்கு ஆதரவு இல்லை; திமுக தலைமையிலான கூட்டணியில் தொடர்வதாக ஐ.யு.எம்.எல். அறிவித்துள்ளது. 2 எம்எல்ஏக்களை கொண்ட இந்திய யூனியன் முஸ்லீம் லீக், தவெகவுக்கு ஆதரவு என்று தகவல் வெளியான நிலையில் விளக்கம் அளிக்கப்பட்டுள்ளது.
ஐயுஎம்எல் கட்சியிடம் ஆதரவு கோரி தவெக எம்.எல்.ஏக்கள் சிடிஆர் நிர்மல்குமார், முஸ்தபா இருவரும் காதர் மொய்தீனுடன் ஒரு மணி நேரம் பேச்சு நடத்தினர். அன்றும் இன்றும் என்றும் திமுக கூட்டணிதான் என ஏற்கெனவே ஐயுஎம்எல் தலைவர் காதர் மொய்தீன் கூறியிருந்தார்.
108 எம்எல்ஏக்களுடன் தவெக தனிப்பெரும் கட்சியாக இருந்தாலும், விஜய் ஆட்சியமைக்க மேலும் 11 எம்எல்ஏக்களின் ஆதரவு தேவைப்பட்டது. இந்தச் சூழலில் காங்கிரஸ் தனது 5 எம்எல்ஏக்களுடன் ஆதரவை தவெகவுக்கு வழங்கியது.
அதைத் தொடர்ந்து, தவெக தலைவர் விஜய் சிபிஐ, சிபிஎம், விசிக, ஐயூஎம்எல் உள்ளிட்ட திமுக கூட்டணியில் இடம்பெற்ற கட்சிகளுக்கு கடிதம் வாயிலாக அழைப்பு விடுத்தார். மேலும், தவெக நிர்வாகிகள் சிபிஐ, சிபிஎம், விசிக, ஐயூஎம்எல் தலைவர்கள், நிர்வாகிகளை நேரில் சென்று சந்தித்து ஆதரவு கோரினர்.
இடதுசாரி கட்சிகளான இந்திய கம்யூனிஸ்ட் மற்றும் மார்க்சிஸ்ட் கம்யூனிஸ்ட், விடுதலைச் சிறுத்தைகள் ஆகிய கட்சிகள் தவெகவுக்கான தனது ஆதரவை இன்று தெரிவித்துள்ளன. சிபிஐ, சிபிஐஎம் ஆகிய கட்சிகள் தவெகவுக்கு ஆதரவு கடிதம் வழங்கினர். ஆனால், விசிக இதுவரை அதிகாரப்பூர்வமாக ஆதரவு கடிதம் வழங்கவில்லை.
இந்தச் சூழலில், இந்திய யூனியன் முஸ்லீம் லீக் கட்சி, தவெகவுக்கு ஆதரவு அளித்துள்ளதாகவும், ஐ.யு.எம்.எல் கட்சி ஆதரவின் மூலம் தவெகவுக்கான ஆதரவு எண்ணிக்கை 120 ஆக அதிகரித்துள்ளதாகவும் தகவல்கள் வெளியாகின. இந்நிலையில் தவெகவுக்கு ஆதரவு இல்லை என ஐ.யூ.எம்.எல் அறிவித்துள்ளது.
இதுகுறித்து ஐயுஎம்எல் மாநில முகநூல் பக்கத்தில், "தவெக ஆதரவு இல்லை. திமுக தலைமையிலான மதச்சார்பற்ற முற்போக்கு கூட்டணியில் இந்திய யூனியன் முஸ்லிம் லீக் தொடர்கிறது" என தெரிவிக்கப்பட்டுள்ளது.
விசிக இன்னும் கடிதம் அளிக்காத நிலையில், தவெகவிற்கு தற்போது ஆதரவாக உள்ள எம்.எல்.ஏக்களின் எண்ணிக்கை 116 ஆக உள்ளது. பெரும்பான்மைக்கு இன்னும் 2 எம்.எல்.ஏக்கள் ஆதரவு தேவைப்படுகிறது. நாளை பதவியேற்பு விழா நடைபெறும் நிலையில் இன்னும் மெஜாரிட்டி உறுதியாகவில்லை. இதனால் தமிழக அரசியலில் உச்ச கட்ட பரபரப்பு ஏற்பட்டுள்ளது.
Click it and Unblock the Notifications
Sign in with Google