சென்னையின் எதிர்காலமே காலி.. பரந்தூர் முடிவால்.. விஜய்யை கொண்டாடும் பெங்களூர், ஹைதராபாத்!

பின்னணி என்ன?

தமிழகத்தின் பொருளாதார வளர்ச்சியை அடுத்த கட்டத்திற்கு எடுத்துச் செல்லும் ஒரு முக்கியமான மெகா உள்கட்டமைப்புத் திட்டமாகப் பார்க்கப்பட்டது பரந்தூர் இரண்டாவது சர்வதேச விமான நிலையம். ஆனால், நிலம் கையகப்படுத்துதல், சுற்றுச்சூழல் பாதுகாப்பு மற்றும் உள்ளூர் விவசாயிகளின் தொடர் போராட்டங்கள் உள்ளிட்ட காரணங்களால், இந்தத் திட்டத்தை கைவிட வேண்டும் என்ற அழுத்தங்கள் ஓரளவிற்கு இருந்தன.

ஆனாலும் 90 சதவிகிதம் நிலம் கையப்படுத்தப்பட்டுவிட்டது. ஆனாலும் முதல்வர் விஜய் இந்த திட்டத்தை கைவிடுவதாக இப்போது அறிவித்துவிட்டார்.

ஆனால், தமிழக அரசின் இந்த முடிவு வெளியான சில மணி நேரங்களிலேயே, அண்டை மாநிலங்களான தெலங்கானாவின் ஹைதராபாத் மற்றும் கர்நாடகாவின் பெங்களூர் ஆகிய தொழில் முதலீட்டு வட்டாரங்களில் பெரும் வரவேற்பும் கொண்டாட்டமும் எழுந்துள்ளதாகத் தகவல்கள் தெரிவிக்கின்றன.

முதலீட்டுப் போட்டியில் சென்னைக்கு விழுந்த சம்மட்டி அடி

உலகளாவிய மாபெரும் நிறுவனங்கள், தகவல் தொழில்நுட்ப ஜாம்பவான்கள் மற்றும் சர்வதேச உற்பத்தி நிறுவனங்கள் ஒரு நகரைத் தேர்வு செய்வதற்கு முதன்மைத் தகுதியாகப் பார்ப்பது தடையற்ற சர்வதேச விமானப் போக்குவரத்து மற்றும் பிரம்மாண்ட சரக்கு கையாளும் வசதியாகும். மீனம்பாக்கம் விமான நிலையம் ஏற்கனவே தன் முழு கொள்ளளவை எட்டிவிட்ட நிலையில், புதிய சர்வதேச விமான நிலையம் அமையாமல் போனால் எதிர்கால பன்னாட்டு முதலீடுகள் சென்னைக்கு வருவது முற்றிலுமாக முடங்கும் அபாயம் ஏற்பட்டுள்ளது.

இந்த பலவீனத்தை தங்களுக்குச் சாதகமாகப் பயன்படுத்திக்கொள்ள பெங்களூர் மற்றும் ஹைதராபாத் தொழில் மேம்பாட்டுக் குழுக்கள் களமிறங்கியுள்ளன. சென்னைக்கு வரவிருந்த பல லட்சம் கோடி ரூபாய் மதிப்பிலான குளோபல் கேப்பபிலிட்டி சென்டர்கள், செமிகண்டக்டர் நிறுவனங்கள், சர்வதேச ஏவியேஷன் மற்றும் தரவு மையத் திட்டங்கள் இனி நேராகத் தங்கள் மாநிலங்களுக்குத் திருப்பப்படும் என்பதால் அங்குள்ள முதலீட்டு அமைப்புகள் இந்த முடிவைக் கொண்டாடி வருகின்றன.

அண்டை மாநிலங்களின் வியூகம்: முன்னிலை பெறும் ஹைதராபாத் & பெங்களூர்

கர்நாடக அரசு பெங்களூர் கெம்பேகவுடா சர்வதேச விமான நிலையத்தை உலகத்தரம் வாய்ந்த 2-வது முனையத்துடன் (T2) அசுர வேகத்தில் விரிவாக்கம் செய்துள்ளது. அதேபோல், தெலங்கானா அரசு ஹைதராபாத் ராஜீவ் காந்தி சர்வதேச விமான நிலையத்தை அடுத்த 30 ஆண்டுகால தேவைக்கேற்ப நவீனப்படுத்தியுள்ளது.

"சர்வதேச நிறுவனங்கள் தென்னிந்தியாவை நோக்கி வரும்போது, தரமான விமான உள்கட்டமைப்பு இல்லாத சென்னை இனி அவர்களின் முன்னுரிமைப் பட்டியலில் இருக்காது. முதலீட்டாளர்களின் ஒற்றைத் தேர்வாக பெங்களூரும் ஹைதராபாத்துமே இருக்கும்" என்று அம்மாநிலங்களின் பொருளாதார ஆய்வாளர்கள் வெளிப்படையாகவே சுட்டிக்காட்டுகின்றனர்.

தமிழகத்தின் தொழில் எதிர்காலத்திற்குப் பின்னடைவா?

மக்களின் உணர்வுகளுக்கு மதிப்பளித்து பரந்தூர் திட்டத்தை முதலமைச்சர் விஜய் ரத்து செய்திருப்பது உள்ளூர் அளவில் பெரும் வரவேற்பைப் பெற்றிருந்தாலும், நீண்ட காலப் பொருளாதாரப் பார்வையில் இது தமிழகத்தின் தொழில் துறைக்கு விழுந்த மிகப்பெரிய பின்னடைவாகப் பார்க்கப்படுகிறது. சுமார் ₹40,000 கோடிக்கும் அதிகமான மதிப்பிலான முதலீடுகள் மற்றும் பல லட்சம் வேலைவாய்ப்புகள் இதனால் அண்டை மாநிலங்களுக்குத் தாரைவார்க்கப்படும் சூழல் உருவாகியுள்ளது.

உடனடியாக ஒரு மாற்று இடத்தை இறுதி செய்து, புதிய சர்வதேச விமான நிலையப் பணிகளைத் துரிதப்படுத்தாவிட்டால், தமிழகம் தென்னிந்தியாவின் முதன்மைத் தொழில் தலைநகரம் என்ற பெருமையை இழக்க நேரிடும் என்றும், இந்த முடிவு அண்டை மாநிலங்களின் வளர்ச்சிக்குத் தமிழகமே சிவப்புக் கம்பளம் விரித்துக் கொடுத்தது போலாகிவிடும் என்றும் தொழில் வல்லுநர்கள் எச்சரிக்கின்றனர்.