தமிழகத்தின் முதல் பி.ஆர்.டி.எஸ்.. சென்னையில் பிரம்மாண்ட போக்குவரத்து மாற்றம்.. பணிகள் ஸ்டார்ட்!

சென்னை: மாநகரின் போக்குவரத்து நெரிசலுக்கு முற்றுப்புள்ளி வைக்கும் வகையில், பிராட்வே முதல் பூந்தமல்லி நெடுஞ்சாலை வரை தமிழகத்தின் முதல் 'பேருந்து விரைவுப் போக்குவரத்து அமைப்பு' (BRTS) முதற்கட்டப் பணிகளை எட்டியுள்ளது. 2023-2048-க்கான விரிவான நகர்ப்புற போக்குவரத்துத் திட்டத்தின் ஒரு பகுதியாக இந்த முன்னெடுப்பு வேகமெடுத்துள்ளது.

சுமார் 23 கிலோமீட்டர் தொலைவு கொண்ட இந்த வழித்தடம், பேருந்துகளுக்கு முன்னுரிமை அளிக்கும் தனிப்பாதையாக மாற்றப்பட உள்ளது. இதற்காகச் சாலையின் அகலத்தை 30 மீட்டராக விரிவாக்கம் செய்யும் பணிகள் மற்றும் நில அளவீட்டுப் பணிகள் தற்போது முடுக்கிவிடப்பட்டுள்ளன.

அதிவேக பேருந்து சேவை

பொதுமக்கள் தடையின்றி விரைவாகப் பயணம் செய்வதை உறுதி செய்ய, இந்தப் பிரத்யேகப் பாதையில் உயர்திறன் கொண்ட பேருந்துகள் இயக்கப்படும். இது தனியார் வாகனங்களின் தேவையைக் குறைத்து, பொதுப் போக்குவரத்துப் பயன்பாட்டை ஊக்குவிக்கும் நோக்கில் வடிவமைக்கப்பட்டுள்ளது. பாதசாரிகளுக்கான மேம்பட்ட வசதிகளும் இதில் இடம்பெறவுள்ளன.

இதேபோல், ஜி.எஸ்.டி சாலையில் கிளாம்பாக்கம் அருகே உள்ள ஊரப்பாக்கம் முதல் செட்டிப்புண்ணியம் வரை 18.4 கிலோமீட்டர் தூரத்திற்குப் புதிய உயர்மட்ட விரைவுச்சாலை அமையவுள்ளது. இதுவும் பி.ஆர்.டி.எஸ் வசதியுடன் ஒருங்கிணைக்கப்படுவது கூடுதல் சிறப்பு.

ரூ. 3,300 கோடி மதிப்பீட்டில் புதிய வழித்தடம்

தேசிய நெடுஞ்சாலைகள் ஆணையம் (NHAI) மேற்கொள்ளும் இந்த உயர்மட்டச் சாலைத் திட்டம் சுமார் ₹3,300 கோடி மதிப்பீட்டில் உருவாக்கப்படுகிறது. தொடக்கத்தில் 25 மீட்டராகத் திட்டமிடப்பட்ட இதன் அகலம், தற்போது 29 மீட்டராக அதிகரிக்கப்பட்டுள்ளது. அவசர கால ஊர்திகள் எளிதாகச் செல்லவும், போக்குவரத்து நெரிசலைக் குறைக்கவும் கூடுதல் வழித்தடங்கள் இதில் சேர்க்கப்பட்டுள்ளன.

ஒவ்வொரு 2 கிலோமீட்டருக்கும் உயர்த்தப்பட்ட தளங்களுடன் கூடிய பேருந்து நிறுத்தங்கள் அமைக்கப்படும். இதன் மூலம் பயணிகள் எளிதாகப் பேருந்துகளில் ஏறி இறங்க முடியும். இது மாநிலத்தின் முதல் பி.ஆர்.டி.எஸ் ஒருங்கிணைந்த மேம்பாலச் சாலையாகத் திகழும்.

பாதுகாப்பான மற்றும் விரைவான பயணம்

ஐயஞ்சேரி மற்றும் காட்டாங்கொளத்தூர் பகுதிகளில் வாகனங்கள் ஏறி இறங்குவதற்கான சரிவுப் பாதைகள் (Ramps) அமைக்கப்படும். இந்தத் திட்டம் செயல்பாட்டிற்கு வரும்போது, சென்னை - திருச்சி தேசிய நெடுஞ்சாலையில் விபத்து நேரிட வாய்ப்புள்ள 14 இடங்கள் கண்டறியப்பட்டுச் சீரமைக்கப்படும்.

இந்த பி.ஆர்.டி.எஸ் (BRTS) திட்டம் சென்னையின் மிக முக்கியமான இரண்டு போக்குவரத்து வழித்தடங்களை இணைக்கிறது. முதல் தடம், நகரின் மையப்பகுதியான பிராட்வேயில் தொடங்கி, பூந்தமல்லி நெடுஞ்சாலை வழியாக மேற்குப் புறநகர் பகுதியான பூந்தமல்லி வரை 23 கி.மீ தொலைவிற்கு அமைகிறது. இரண்டாவது தடம், தென் சென்னையின் நுழைவாயிலான கிளாம்பாக்கம் பேருந்து முனையம் அருகே உள்ள ஊரப்பாக்கத்தில் தொடங்கி, ஜி.எஸ்.டி சாலை வழியாக செட்டிப்புண்ணியம் (மஹிந்திரா சிட்டி அருகில்) வரை 18.4 கி.மீ தொலைவிற்கு நீள்கிறது. இந்த வழித்தடம் இடையில் ஐயஞ்சேரி, காட்டாங்கொளத்தூர், மற்றும் சிங்கபெருமாள் கோவில் ஆகிய முக்கிய பகுதிகளை இணைப்பதோடு, சென்னை புறவழிச் சாலையுடனும் (Peripheral Ring Road) ஒருங்கிணைகிறது.

நவீன கட்டமைப்பில் இந்தச் சாலை உருவாக்கப்பட உள்ளது. கட்டுமானப் பணிகளுக்கு இடையூறாக உள்ள மின் கம்பிகளை அகற்றும் பணிகள் விரைவில் தொடங்கவுள்ளன. இதன் மூலம் பண்டிகைக் காலங்களில் ஏற்படும் கடும் போக்குவரத்து நெரிசல் பெருமளவு குறையும் என எதிர்பார்க்கப்படுகிறது.

English summary

Broadway–Poonamallee Corridor of Chennai’s First BRTS Pilot works to begin soon