விஜயின் ‛ஜனநாயகன்' வெளியாவதில் சிக்கல்.. தணிக்கை சான்று கிடைப்பதில் தாமதம்.. காரணம் இதுதான்
சென்னை: நடிகர் விஜயின் கடைசி திரைப்படமான ‛ஜனநாயகன்' ஜனவரி 9ம் தேதி திரையரங்குகளில் வெளியாக உள்ளது. இந்நிலையில் தான் திரைப்படத்துக்கு தணிக்கை சான்று கிடைப்பதில் தாமதம் ஏற்பட்டுள்ளது. இதனால் திட்டமிட்டப்படி ‛ஜனநாயகன்' திரைப்படம் ஜனவரி 9 ம் தேதி ரிலீஸ் ஆகுமா? என்ற கேள்வி எழுந்துள்ளது.
தமிழ் சினிமாவில் முன்னணி நடிகராக இருப்பவர் விஜய். இந்நிலையில் தான் அவர் தமிழக வெற்றிக் கழகத்தை தொடங்கி உள்ளார். நடைபெற உள்ள சட்டசபை தேர்தலில் விஜயின் தமிழக வெற்றிக் கழகம் களமிறங்க உள்ளது. விஜயும் தீவிர அரசியலில் கவனம் செலுத்த உள்ளார்.
இதனால் அவர் திரைப்படத்துக்கு முழுக்கு போட்டுள்ளார். தற்போது தயாராகி உள்ள ‛ஜனநாயகன்' திரைப்படம் தான் தனது கடைசி படம் என்று விஜய் அறிவித்துள்ளார். இந்த திரைப்படத்தை இயக்குநர் எச் வினோத் இயக்கி உள்ளார். அனிருத் இசையமைத்துள்ளார்.
பொங்கல் பண்டிகையையொட்டி ‛ஜனநாயகன்' திரைப்படம் ஜனவரி 9 ம் தேதி திரையரங்கங்களில் வெளியாக உள்ளது. இதற்கான அதிகாரப்பூர்வ அறிவிப்பு வெளியிடப்பட்டுள்ளது. மேலும் சமீபத்தில் மலேசியாவில் ‛ஜனநாயகன்' இசை வெளியீட்டு விழா கோலாகலமாக நடந்தது. விஜய் பங்கேற்று நடனமாடியதோடு, ரசிகர்கள் மத்தியில் பேசினார்.
இந்நிலையில் தான் தற்போது ‛ஜனநாயகன்' திரைப்படத்துக்கு புதிய சிக்கல் ஏற்பட்டுள்ளது. அதாவது திரைப்படத்துக்கு தணிக்கை சான்று கிடைக்கவில்லை. ‛ஜனநாயகன்' திரைப்படத்துக்கு தணிக்கை சான்று வாங்கும் பணியை படக்குழு மேற்கொண்டு வருகிறது. படக்குழு சார்பில் திரைப்படம் கடந்த மாதம் தணிக்கை குழுவிற்கு அனுப்பி வைக்கப்பட்டது.
டிசம்பர் 19ம் தேதி ‛ஜனநாயகன்' திரைப்படத்தை தணிக்கை குழு பார்த்தது. அப்போது சில காட்சிகளை நீக்க வேண்டும் என்றும் கூறியிருந்தது. இதையடுத்து அந்த காட்சிகளை படக்குழு நீக்கி மறு தணிக்கைக்கு அனுப்பியது.
இருப்பினும் தற்போது வரை தணிக்கை சான்று கிடைக்கவில்லை. இன்று ஜனவரி 2ம் தேதி. திரைப்படம் ஜனவரி 9 ம் தேதி வெளியாக உள்ளது. இன்னும் 7 நாட்கள் மட்டுமே உள்ள நிலையில் தணிக்கை சான்று கிடைப்பதில் தாமதம் ஏற்பட்டுள்ளது. இதனால் ‛ஜனநாயகன்' திரைப்படம் திட்டமிட்டபடி வெளியாகுமா? இல்லையா? என்ற கேள்வி எழுந்துள்ளது.
Click it and Unblock the Notifications
Sign in with Google