TNPSC தேர்வு: கட்டாய தமிழ் அரசாணைப்படி புதிய பாடத்திட்டம், தேர்வு மாதிரி வினாத்தாள் வெளியீடு!

தமிழ்நாடு அரசு பணியாளர் தேர்வாணையம் சார்பில் நடத்தப்படும் தேர்வுகளில் புதிய அரசாணைப்படி வினாத்தாள் மற்றும் பாடத்திட்டம் எப்படி இருக்கும் என்பது குறித்து அறிவிப்பு வெளியாகி உள்ளது.

சென்னை: தமிழக அரசு பணியாளர் தேர்வுகளில் TNPSC தமிழ் மொழி கட்டாயம் என அரசாணை கடந்த டிசம்பர் 3 ஆம் தேதி வெளியிடப்பட்டுள்ள நிலையில், அது குறித்த பாடத்திட்டம் மற்றும் மாதிரி வினாத்தாள் வெளியிடப்பட்டுள்ளது.

தமிழக அரசின் பல்வேறு துறைகளுக்கு தேவைப்படும் ஊழியர்கள், அலுவலர்கள் தமிழ்நாடு அரசு பணியாளர் தேர்வாணையம் மூலம் தேர்வு செய்யப்பட்டு வருகின்றனர். இதன் மூலம் போட்டி தேர்வுகள் ,நேர்காணல் தேர்வுகள் ஆகியவற்றை தமிழ்நாடு அரசு பணியாளர் தேர்வாணையம் நடத்துகிறது. அரசு பணிகளின் அடிப்படையில் இந்த தேர்வுகள் குரூப் 1, குரூப் 2, குரூப் 3 மற்றும் குரூப் 4 மற்றும் குரூப் 5,6,7,8 ஆகிய தேர்வுகள் உள்ளன.

இந்நிலையில் அரசு துறைகளுக்கு ஊழியர்கள் முதல் அதிகாரிகள் வரை தேர்வு செய்ய நடத்தப்படும் டிஎன்பிஎஸ்சி எனப்படும் அரசு பணியாளர் தேர்வு வாரியத்தின் புதிய பணி நியமனங்கள் மேற்கொள்ளப்படும் என்ற விவரம் முன்கூட்டியே திட்ட அறிக்கையாக வெளியிடப்படும்.

அதன்படி 2022ஆம் ஆண்டில் மேற்கொள்ள உள்ள பணி நியமனங்கள் போட்டித் தேர்வுகள் மற்றும் தேர்வு விதிமுறைகள் குறித்த திட்ட அறிக்கை கடந்த சில வாரங்களுக்கு முன்பு வெளியானது.

டிஎன்பிஎஸ்சி தமிழ் கட்டாயம்

TNPSC தேர்வுகளில் தமிழ் மொழி கட்டாயம் என அரசாணை கடந்த டிசம்பர் 3 ஆம் தேதி வெளியிடப்பட்டுள்ள நிலையில், அது குறித்த பாடத்திட்டம் மற்றும் மாதிரி வினாத்தாள் வெளியிடப்பட்டுள்ளது. இது குறித்து தமிழக அரசு வெளியிட்ட அரசாணையில், தமிழ் மொழித் தகுதித் தாள் (Qualifying Paper), தேர்வர்கள் அனைவருக்கும் கட்டாயமாக்கப்படுகிறது.

கட்டாய தமிழ் மொழித்தாள்

தமிழ் மொழித் தகுதித் தேர்வுக்கான பாடத்திட்டம் பத்தாம் வகுப்புத் தரத்தில் நிர்ணயம் செய்யப்படுகிறது. மேற்கண்டவாறு நடத்தப்படும் கட்டாய தமிழ்மொழித் தாளில் குறைந்தபட்சம் 40 சதவீத மதிப்பெண் தேர்ச்சி (Minimum Qualifying Marks) கட்டாயமாக்கப்படுகிறது.

தேர்வுத்தாள் மதிப்பீடு செய்யப்படாது

தகுதித் தாளில் தேர்ச்சி பெறாதவர்களின் இதர போட்டித் தேர்வுத்தாள் மதிப்பீடு செய்யப்படமாட்டாது. இந்த அரசாணையின் விளைவாக வெளி மாநிலத்தை சேர்ந்தவர்கள் அல்லது தமிழ் மொழியில் அடிப்படை புலமை இல்லாதவர்களால், தமிழக அரசுப் பணிகளில் சேர முடியாது என்ற நிலை ஏற்பட்டுள்ளது.

மாதிரி வினாத்தாள்

புதிய விதிகளின்படி தேர்வு வினாத்தாள் எப்படி இருக்கும் என விண்ணப்பதாரர்கள் மத்தியில் கேள்வி எழுந்தது. அது மட்டுமில்லாமல் இந்த தேர்வுக்கான பாடத்திட்டம் எப்படி இருக்கும் என அரசுத் தேர்வு ஆர்வலர்கள் கேள்வி எழுப்பினார்கள். அதனை தொடர்ந்து புதிய பாடத்திட்டம் மற்றும் மாதிரி வினாத்தாள் குறித்த விபரங்கள் வெளியாகி உள்ளது. புதிய பாடத்திட்டம் - வினாத்தாள் விபரங்களுக்கு https://www.tnpsc.gov.in/English/new_syllabus.html என் லிங்க் கிளிக் செய்யவும்.

English summary

TNPSC revised syllabus and sample question paper have been published as the government has made TNPSC Tamil language compulsory in Tamil Nadu civil service examinations.