ஸ்பெயின் சுற்றுலாப் பயணிகள் படுகொலை .. குற்றவாளிகளுக்கு போலீஸ் வலைவீச்சு

சிம்லா:

சிம்லாவுக்கு வந்த வெளிநாட்டுச் சுற்றுலாப் பயணிகளை அவர்கள் தங்கியிருந்த மலையேற்ற கூடாரத்திற்குச் சென்று கொலை செய்து பணத்தைக்கொள்ளையடித்த கும்பலை பிடிப்பதற்காக மாநிலம் முழுவதும் போலீஸார் உஷார் படுத்தப்பட்டுள்ளனர்.

ஹிமாச்சலப் பிரதேச மாநிலத்திலுள்ள சிம்லா மிகச் சிறந்த சுற்றுலா ஸ்தலமாகும். இங்கு வெளிநாட்டுப் பயணிகள் பலர் வருவது வழக்கம். ஸ்பெயின் நாட்டைச்சேர்ந்த சுற்றுலாப் பயணிகளான மரியா ஏஞ்சல்ஸ் கிரோனஸ் (35) என்பவரும், அவரது மகன் கிறிஸ்டோபெல் (15) என்பவரும் குலு மாவட்டத்திலுள்ளடங்காகோஷ் பகுதியில் கூடாரம் அமைத்துத் தங்கியிருந்தனர்.

கடந்த வெள்ளிக்கிழமை இரவு அடையாளம் தெரியாத கும்பல் ஒன்று இந்தக் கூடாரத்துக்கு வந்து அவர்களை ஆயுதங்களால் தாக்கிக் கொலை செய்துவிட்டுப் பொருட்களைக் கொள்ளையடித்துக் கொண்டு சென்று விட்டது.

பக்கத்துக் கூடாரத்தில் தங்கியிருந்த பிரிட்டனைச் சேர்ந்த மார்ட்டின் என்ற வாலிபரையும் அக்கும்பல் தாக்கியது. அவர் டெல்லியில் சிவில்என்ஜினியராக வேலை பார்த்து வருகிறார்.

அக்கும்பல் தப்பித்துச் செல்லுமுன், மூன்று பேரையும் அருகிலிருந்து 40 அடி ஆழமுள்ள பள்ளத்தில் தள்ளி விட்டுவிட்டுச் சென்றது. ஆனால், அதிர்ஷ்டவசமாகஉயிர் தப்பித்த மார்ட்டின் அடுத்த நாள் காலை அந்த வழியே வந்த ஒரு போர்ட்டரிடம் இதுகுறித்துக் கூறினார். அவர் அங்குள்ள தேசிய நீர் மின்சாரக் கழகஅதிகாரிகளிடம் கூறினார். அவர்கள் பின்னர் போலீஸாருக்குத் தகவல் தெரிவித்தனர்.

மார்ட்டினை டெல்லிக்குக் கொண்டு வரலாமா என்பது குறித்தும், அவரது உடல்நிலை குறித்து பரிசோதிப்பதற்காகவும் டெல்லியிலிருந்து டாக்டர் ஒருவர்சிம்லா விரைந்துள்ளார். மார்ட்டின் அபாய கட்டத்தைத் தாண்டி விட்டார் என்று அவரைப் பரிசோதித்த பிற டாக்டர்கள் கூறினர்.

முன்னதாக, தலைமை போலீஸ் கண்காணிப்பாளர் அடங்கிய உயர் போலீஸ் அதிகாரிகள் குழு ஒன்று இச்சம்பவத்தில் இறந்த ஸ்பெயின் நாட்டு சுற்றுலாப்பயணிகளின் உடல்களை குலுவுக்குக் கொண்டு வருவதற்காக சம்பவ இடத்திற்கு விரைந்துள்ளனர்.

மாநிலம் முழுவதும் போலீஸார் உஷார்படுத்தப்பட்டுள்ளனர். குற்றவாளிகள் எங்கிருந்தாலும் அவர்களை உடனடியாகப் பிடிக்கும்படி உத்தரவுபிறப்பிக்கப்பட்டுள்ளது.

அக்கும்பல் மாநிலத்திலிருந்து தப்பிக்க முடியாதபடி நகரின் முக்கிய சந்திப்புக்களில் போலீஸார் ரோந்து சுற்றி வருகின்றனர்.

யு.என்.ஐ.