அமெரிக்க இரவு விடுதியில் தீ விபத்து: 95 பேர் பலி

வெஸ்ட் வார்விக்:

அமெரிக்காவின் ரோட் தீவில் உள்ள வெஸ்ட் வார்விக் நகரில் நைட் கிளப்பில் ஏற்பட்ட மிகப் பெரும் தீ விபத்தில்95 பேர் உயிரிழந்துள்ளனர். மேலும் 180 பேருக்கு பலத்த தீக்காயம் ஏற்பட்டுள்ளது.

நேற்றிரவு இச் சம்பவம் நடந்தது. முழுக்க முழுக்க மரத்தினால் கட்டப்பட்ட இந்த பார் அடங்கிய கிளப்பில் இசைநிகழ்ச்சியும் நடந்து கொண்டிருந்தது. அப்போது வெடிகளும் வெடிக்கப்பட்டன. இதில் மரத்தினாலான அந்தவிடுதியில் தீப் பிடித்துக் கொண்டது.

அடுத்த 3 நிமிடங்களில் நாலாபுறமும் தீ பரவ உள்ளே இருந்த நூற்றுக்கணக்கானவர்கள் உயிர் பிழைக்க ஓடினர்.ஆனால், தீ மிக வேகமாகப் பரவியதால் 95 பேர் உடல் கருகி உயிரிழந்துவிட்டனர்.

தப்பியோடிய சுமார் 180 பேருக்கும் பலத்த தீக்காயம் ஏற்பட்டுள்ளது.

சிகாக்கோவில் சில நாட்களுக்கு முன்பு தான் இரவு விடுதியில் ஏற்பட்ட நெரிசலில் 21 பேர் உயிரிழந்தனர்.அதற்குள் அடுத்த விபத்து நடந்துள்ளது.

அமெரிக்காவில் நடந்த இரண்டாவது மிகப் பெரிய நைட்கிளப் விபத்து இதுவாகும். 1977ம் ஆண்டில்கென்டகியில் நடந்த ஒரு தீ விபத்தில் 164 பேர் உயிரிழந்தனர்.

நியூயார்க்கில் பெரும் தீ விபத்து:

இந் நிலையில் நியூயார்க்கில் உள்ள எக்ஸான் மொபில் எண்ணெய் நிறுவனத்தின் கிடங்கில் ஏற்பட்ட வெடிவிபத்தில் இருவர் பலியாயினர்.

ஸ்டேடன் தீவில் ஏற்பட்ட இந்த விபத்தினால் பல டன் எண்ணெய் தீப்பற்றி எரிந்தது. இதனால் பல கி.மீ.உயரத்துக்கு விண்ணில் கரும்புகை கிளம்பியது.

இதனால் தீவிரவாதிகள் மீண்டும் நியூயார்க்கில் தாக்குதல் நடத்திவிட்டதாகக் கருதி மக்கள் அச்சத்தில் ஆழ்ந்தனர்.

-->