பா.ம.க. வேட்பாளர்கள் வரும் 1ம் தேதி அறிவிப்பு

சென்னை:

பா.ம.க. தனது வேட்பாளர்களை வரும் 1ம் தேதி அறிவிக்கும் என பா.ம.க. தலைவர் ஜி.கே.மணி தெரிவித்துள்ளார்.

இது தொடர்பாக அவர் வெளியிட்டுள்ள அறிக்கையில், கட்சியின் மாநில அவசர செயற்குழுக் கூட்டம் வரும் 1ம் தேதி சென்னையில் நடக்கிறது. அக்கூட்டத்தில் கட்சியின் சட்டமன்ற உறுப்பினர்கள், முன்னாள் நாடாளுமன்ற உறுப்பினர்கள், மாவட்ட செயலாளர்கள் உள்ளிட்ட முக்கிய நிர்வாகிகள் கலந்து கொள்வார்கள்.

அன்று மாலை பத்திரிக்கையாளர்கள் சந்திப்பின்போது 6 தொகுதிகளுக்கான பா.ம.க. வேட்பாளர்களை பா.ம.க. நிறுவனர் ராமதாஸ் வெளியிடுவார் என்று தெரிவித்துள்ளார்.

திமுகவும் தனது வேட்பாளர்களை மார்ச் 1ம் தேதி அறிவிப்பதாகத் தெரிவித்துள்ளது குறிப்பிடத்தக்கது.