பா.ஜ.கவுக்கு எதிராக பிரசாரம் செய்த 4 முஸ்லீம்கள் கைது

கோவை:

தேசிய ஜனநாயகக் கூட்டணிக்கு எதிராக வாக்களிக்குமாறு துண்டுப் பிரசுரம் விநியோகித்த, மனித நீதி பாசறை,விடியல் வெள்ளி வாசகர் வட்டம் ஆகிய அமைப்புகளைச் சேர்ந்த 4 பேரை போலீஸார் கைது செய்துள்ளனர்.

கோவை மாவட்டம் திருப்பூர் டவுன் ஹால் பகுதியில் இந்த அமைப்புகளைச் சேர்ந்த 4 பேர் அப்பகுதியில் துண்டுப்பிரசுரங்களை வழங்கிக் கொண்டிருந்தனர். மேலும் டிரம் அடித்து பாடல்களையும் பாடினர். தேசிய ஜனநாயகக்கூட்டணி ஆட்சிக்கு வந்தால் முஸ்லீம்களுக்குப் பாதிப்பு ஏற்படும் என்ற வாசகங்கள் இடம் பெற்ற துண்டுப்பிரசுரங்களை அவர்கள் விநியோகித்தனர்.

இதையடுத்து போலீஸார் விரைந்து சென்று ஜாபர் சாதிக், முகம்மது யாசர், ஜியா உர் ரஹ்மான், ஹபீப் ரஹ்மான்ஆகிய 4 பேரையும் கைது செய்தனர். மத துவேஷத்தைத் தூண்டும் வகையில் அவர்கள் செயல்பட்டதாகக் கூறிபோலீஸார் வழக்குத் தொடர்ந்துள்ளனர்.