தீபாவளி நெரிசல்: 220 சிறப்பு ரயில்கள்- தென்னக ரயில்வே திட்டம்

சென்னை:

தீபாவளி கூட்ட நெரிசல் காரணமாக 220 சிறப்பு ரயில்களை இயக்க தென்னக ரயில்வே திட்டமிட்டுள்ளது.

நாடு முழுவதும் தீபாவளி, நவராத்திரி பண்டிகையை முன்னிட்டு 734 சிறப்பு ரயில்கள் இயக்கப்படவுள்ள நிலையில், தென்னக ரயில்வேயும்220 சிறப்பு ரயில்களை இயக்கத் திட்டமிட்டுள்ளது.

இதில் சென்னையில் இருந்து தமிழகத்தின் பல்வேறு நகர்களுக்கும் 168 ரயில்கள் இயக்கப்படுகின்றன.

சென்னை-மதுரை இடையே 36 சிறப்பு ரயில்களும், சென்னை-கோவை இடையே 42 ரயில்களும், சென்னை-நெல்லை இடையே 60ரயில்களும், சென்னை-செகந்திராபாத் இடையே 8 ரயில்களும், சென்னை-திருவனந்தபுரம் இடையே 22 ரயில்களும் இயக்கப்படுகின்றன.

அதே போல திருச்சி-திருநெல்வேலி இடையே 20 ரயில்களையும் இயக்க முடிவு செய்யப்பட்டுள்ளது. பெங்களூர்-சென்னை இடையிலும்சிறப்பு ரயில்கள் இயக்கப்படவுள்ளன.

சிறப்பு ரயில்களின் கால அட்டவணை விரைவில் வெளியாகும் என அதிகாரிகள் தெரிவித்துள்ளனர்.