டி.எஸ்.பி. மனைவி தற்கொலை வழக்கு-சிவகாசி ஜெயலட்சுமி விடுதலை

டெல்லி:18 வயதுக்குட்பட்ட பெண்கள் காதலிக்கவோ, கல்யாணம் செய்து கொள்ளவோ தடை விதிக்க முடியாது, அது குற்றச் செயலும் அல்ல என்று டெல்லி செஷன்ஸ் நீதிமன்றம் பரபரப்பு தீர்ப்பு வழங்கியுள்ளது.

டெல்லியைச் சேர்ந்த அஜீத் குமார் என்பவரும், 17 வயது இளம் பெண் ஒருவரும் காதலித்தனர். சாதியைக் காரணம் காட்டி இருவரும் காதலிக்க, கல்யாணம் செய்து கொள்ள இருவரது பெற்றோரும் எதிர்ப்பு தெரிவித்தனர்.

ஆனால் பெற்றோர் எதிர்ப்பை மீறி இருவரும் வீட்டை விட்டு வெளியேறி கோவிலில் வைத்து தாலி கட்டி கல்யாணம் செய்து கொண்டனர். பின்னர் தனிக் குடித்தனத்தையும் தொடங்கி வசிக்கத் தொடங்கினர்.

இதையடுத்து பெண்ணைக் கடத்திக் கொண்டு போய் கற்பழித்து விட்டதாக அஜீத்குமார் மீது பெண்ணின் பெற்றோர் புகார் கொடுத்தனர். இதையடுத்து அஜீத் குமாரை போலீஸார் கைது செய்து அவர் மீது மைனர் பெண்ணைக் கற்பழித்ததாக வழக்கு தொடர்ந்தனர்.

இந்த வழக்கை டெல்லி 2வது கூடுதல் செஷன்ஸ் நீதிமன்றம் விசாரித்தது. பின்னர் இந்த வழக்கை நீதிமன்றம் தள்ளுபடி செய்தது. நீதிபதி காமினி பிறப்பித்த தீர்ப்பில், 18 வயதுக்குட்பட்ட பெண்கள் காதலிக்கக் கூடாது, கல்யாணம் செய்து கொள்ளக் கூடாது என்று தடை விதிக்க முடியாது.

காதலிப்பதும், கல்யாணம் செய்து கொள்வதும் குற்றச் செயல் அல்ல. யார் வேண்டுமானாலும், யாரையும் காதலிக்கலாம். இதற்கு அரசியல் சட்டத்தின் 21வது பிரிவு வகை செய்கிறது.

குடும்பத்தினர் கட்டாயப்படுத்தியதால்தான் தனது காதலரை வரவழைத்து அந்தப் பெண் கோவிலில் போய் திருமணம் செய்து கொண்டுள்ளார். எனவே அவர் விரும்பித்தான் அஜீத்குமாரை கல்யாணம் செய்து கொண்டுள்ளார். எனவே அஜீத்குமார் மீதான கற்பழிப்பு புகாரை ஏற்க முடியாது.

மேலும் பெண்ணின் மருத்துவப் பரிசோதனை அறிக்கையில் அவரது உடலில் ரத்தப் பெருக்கோ அல்லது வெளிக் காயங்களோ இல்லை என்று கூறப்பட்டுள்ளது. இருவருக்கும் இடையில் தாம்பத்ய உறவு நடந்துள்ளது. ஆனால் கல்யாணமான இவர்களுக்கிடையே தாம்பத்ய உறவு நடந்ததில் எந்த ஆச்சரியமும் இல்லை என்று பரபரப்புத் தீர்ப்பளித்தார் நீதிபதி காமினி.

மைனர் காதல் விவகாரத்தில் இந்தத் தீர்ப்பு மிக முக்கியமானதாகக் கருதப்படுகிறது. வழக்கமான மைனர் பெண் காதலித்து திருமணம் செய்தால், அவரை மணம் முடித்தவர் மீது கற்பழிப்பு வழக்கு போடப்படுவது வழக்கமாக உள்ள நிலையில் இந்தத் தீர்ப்பு கிரிமினல்-சிவில் சட்டம் தொடர்பான மிக முக்கிய திருப்பமாகக் கருதப்படுகிறது.