குஜராத் சட்டசபை தேர்தல் தேதி அறிவிப்பு- டிசம்பரில் 2 கட்டங்களாக நடக்கிறது

டெல்லி:

குஜராத் மற்றும் இமாச்சலப் பிரதேச மாநில சட்டசபைகளுக்கு இரண்டு கட்டங்களாக தேர்தல் நடைபெறவுள்ளது. இதற்கான தேதிகளை தலைமைத் தேர்தல் ஆணையர் கோபாலசாமி நேற்று அறிவித்தார்.

குஜராத்தில் தற்போது பாஜக ஆட்சியும், இமாச்சலப் பிரதேசத்தில் வீரபத்ர சிங் தலைமையில் காங்கிரஸ் ஆட்சியும் நடந்து வருகின்றன.

குஜராத் சட்டசபையின் ஆயுட்காலம் டிசம்பர் 26ம் தேதியும், இமாச்சல பிரதேச சட்டசபை ஆயுட்காலம் அடுத்த ஆண்டு மார்ச் 9ம் தேதியும் முடிகிறது.

இதையடுத்து இரு மாநில சட்டசபைகளுக்கும் தேர்தல் தேதியை தேர்தல் ஆணையம் அறிவித்துள்ளது. இதுகுறித்து தலைமைத் தேர்தல் ஆணையர் கோபாலசாமி நேற்று தேதிகளை அறிவித்து, தேர்தல் நடத்தை விதிமுறைகள் நேற்று முதல் அமலுக்கு வருவதாகவும் அறிவித்தார்.

குஜராத் தேர்தல்:

மொத்தம் 182 தொகுதிகளைக் கொண்ட குஜராத் சட்டசபைக்கு டிசம்பர் 11 மற்றும் 16 ஆகிய தேதிகளில் இரு கட்டங்களில் தேரத்ல் நடைபெறும்.

முதல் கட்டத் தேர்தல் 87 தொகுதிகளுக்கும், 2வது கட்டத் தேர்தல் 95 தொகுதிகளுக்கும் நடைபெறும். முதல் கட்டத் தேர்தலுக்கான வேட்பு மனு தாக்கல் நவம்பர் 15ம் தேதி தொடங்குகிறது. 2வது கட்டத் தேர்தலுக்கான வேட்பு மனு நவம்பர் 21ம் தேதி தொடங்கும். பதிவான வாக்குகள் டிசம்பர் 23ம் தேதி நடைபெறும்.

இமாச்சலப் பிரதேசம்:

இங்குள்ள 68 தொகுதிகளில், பனிப்பொழிவு விரைவில் தொடங்கியுள்ள 3 தொகுதிகளுக்கு மட்டும் முதல் கட்டமாக நவம்பர் 14ம் தேதி நடைபெறும். இதற்கான வாக்குப் பதிவு வருகிற 20ம் தேதி தொடங்குகிறது.

மீதமுள்ள 65 தொகுதிகளுக்கும் டிசம்பர் 19ம் தேதி வாக்குப் பதிவு நடைபெறும். இத் தேர்தலில் பதிவாகும் வாக்குகள் டிசம்பர் 28ம் தேதி எண்ணப்படும்.