புத்தக கொள்முதல் முறைகேடு: “தவறு செய்த ஒருவரை கூட கண்டுபிடிக்க முடியவில்லையா?” - ஐகோர்ட் கேள்வி!
மதுரை: "புத்தகக் கொள்முதல் முறைகேடு விவகாரத்தில் தவறு செய்த ஒருவரைக் கூட கண்டுபிடிக்க முடியவில்லையா?" என அரசு பொது நூலகத்துறை இயக்குநரிடம் உயர் நீதிமன்றக் கிளை கேள்வி எழுப்பியுள்ளது.
4 பேரிடம் விசாரணை நடத்தப்பட்டுள்ளது என்றும், 16 ஆம் தேதிக்குள் வழக்குப்பதிவு செய்துவிடுவோம் என்றும் அரசுத் தரப்பு பதில் அளித்த நிலையில் விரிவான அறிக்கை தாக்கல் செய்ய நீதிபதிகள் உத்தரவு பிறப்பித்துள்ளனர்.
கடந்த திமுக ஆட்சியில் கோவை காந்திபுரத்தில் சுமார் 7 ஏக்கரில் ரூ.300 கோடி மதிப்பில் பெரியார் அறிவுலகம் என்ற பெயரில் பிரமாண்ட நூலகம் கட்டப்பட்டது. இறுதிக்கட்ட பணிகள் நடைபெற்று வந்த நிலையில், ஆட்சி மாற்றம் ஏற்பட்டது. 7 மாடிகளுடன் கட்டப்பட்ட பெரியார் அறிவுலகத்தை முதலமைச்சர் விஜய் கடந்த அக்டோபர் 16 ஆம் தேதி திறந்து வைத்தார்.
இந்த நிலையில், பெரியார் அறிவுலகத்தில் இடம்பெற்றுள்ள புத்தகங்கள் கொள்முதல் செய்யப்பட்டதில் ஊழல் நடந்து இருப்பதாக, அந்த நூலகத்துக்கான புத்தகங்களை வாங்குவதற்கான பரிந்துரை குழுவில் இடம்பெற்று இருந்த எழுத்தாளர் பெருமாள் முருகன் பரபரப்பு குற்றச்சாட்டை தெரிவித்தார். பெருமாள் முருகனின் இந்த குற்றச்சாட்டு தமிழக அரசியலிலும், இலக்கிய உலகிலும் பெரும் பரபரப்பை ஏற்படுத்தியது.
இந்தச் சூழலில் நெல்லை கிருஷ்ணாபுரத்தைச் சேர்ந்த ராமசுப்பு, உயர் நீதிமன்ற மதுரை அமர்வில் ஒரு மனுவை தாக்கல் செய்தார். அந்த மனுவில், நூலகங்களுக்கு புத்தகம் கொள்முதல் தொடர்பாக உயர் நீதிமன்ற மதுரை அமர்வு 2024-ல் பல கட்டுப்பாடுகளை விதித்து உத்தரவிட்டது. அந்த உத்தரவு அமல்படுத்தப்படவில்லை எனச் சுட்டிக்காட்டியுள்ளார்.
இந்நிலையில் தமிழகத்தில் நூலகங்களுக்கு புத்தகம் கொள்முதல் செய்ததில் மிகப்பெரியளவில் முறைகேடு நடந்திருப்பது வெளிச்சத்துக்கு வந்துள்ளது. இந்த முறைகேடு பெரியார் அறிவுலகத்துக்கான 2026-ம் ஆண்டின் கொள்முதல் உத்தரவுகளுடன் மட்டும் இல்லாமல் மதுரையில் உள்ள கலைஞர் நூற்றாண்டு நூலகம் வரை நீள்கிறது. பல ஆண்டுகளாக முறைகேடு நடைபெற்று வருகிறது.
தவறு இழைத்த அதிகாரிகள் மற்றும் மோசடி பதிப்பாளர்கள் மீது குற்றவியல் நடவடிக்கை எடுக்க சிபிஐ அல்லது சிபிசிஐடி விசாரணைக்கு உத்தரவிட வேண்டும் என அந்த மனுவில் கூறப்பட்டிருந்தது.
இந்த மனு நீதிபதிகள் ஜி.ஆர்.சுவாமிநாதன், எம்.டி.சுமதி அமர்வில் நேற்று விசாரணைக்கு வந்தது. பொது நூலகத்துறை இயக்குநர் ஷஜீவனா காணொளியில் ஆஜரானார். விசாரணையின்போது நீதிபதிகள், "அகல் விளக்கு பதிப்பகம் மற்றும் அதன் உரிமையாளரின் வங்கி கணக்குகளை முடக்காமல் வைத்திருப்பது ஏன்?" என கேள்வி எழுப்பினர்.
இந்த முறைகேடு தொடர்பாக லஞ்ச ஒழிப்பு போலீஸார் உடனடியாக வழக்குப் பதிவு செய்ய வேண்டும். கடந்த 2 ஆண்டுகளாக நடந்த புத்தகக் கொள்முதல் தொடர்பான அனைத்து விவரங்களையும், கொள்முதல் செய்த அதிகாரிகளின் பட்டியலையும் அரசு தாக்கல் செய்ய வேண்டும். அகல் விளக்கு பதிப்பகம் மற்றும் அதன் உரிமையாளரின் வங்கிக் கணக்குகளை உடனே முடக்க வேண்டும் என உத்தரவிட்டனர்.
இந்நிலையில் இந்த வழக்கு இன்று மீண்டும் விசாரணைக்கு வந்தது. பொது நூலகத்துறை இயக்குநர் ஷஜீவனா காணொளிக் காட்சு வாயிலாக ஆஜரானார். அப்போது நீதிபதிகள், அகல்விளக்கு பதிப்பகத்திடம் புத்தகங்களை கொள்முதல் செய்ய பரிந்துரை செய்தது யார்? எனக் கேள்வி எழுப்பினர்.
அதற்கு, 112 உறுப்பினர்களை கொண்ட குழு அகல் விளக்கு பதிப்பக நூல்களை கொள்முதல் செய்ய பரிந்துரை செய்ததாக அரசு தரப்பில் பதில் அளிக்கப்பட்டுள்ளது.
அகல் விளக்கு பதிப்பகத்திடமிருந்து 1,700 புத்தகங்களை வாங்க திட்டமிட்டு நூலகத்துறை இயக்குநா் ரூ.17 லட்சம் கொடுத்துள்ளாா் பிரதமரின் மனதின் குரல் தொடர்பான புத்தகத்தை குழு பரிந்துரைத்தது, ஆனால் கொள்முதல் செய்யப்படவில்லை. தவறு செய்த ஒரு நபரை கூட கண்டுபிடிக்க முடியவில்லையா?" என்றும் சென்னை உயர்நீதிமன்ற மதுரை கிளை நீதிபதிகள் பொது நூலகத்துறை இயக்குநரிடம் கேள்வி எழுப்பினர்.
4 பேரிடம் விசாரணை நடத்தப்பட்டுள்ளது என்றும், 16 ஆம் தேதிக்குள் வழக்குப்பதிவு செய்துவிடுவோம் என்றும் அரசுத் தரப்பு பதில் அளித்த நிலையில் விரிவான அறிக்கை தாக்கல் செய்ய உத்தரவிட்ட நீதிபதிகள் வழக்கு விசாரணையை 17 ஆம் தேதிக்கு ஒத்திவைத்து உத்தரவு பிறப்பித்துள்ளனர்.
Click it and Unblock the Notifications
Sign in with Google
