மார்கரெட் தாட்சருக்கு சுகவீனம் - மருத்துவமனையில் அனுமதி

லண்டன்: இங்கிலாந்து முன்னாள் பிரதமர் மார்கரெட் தாட்சர் உடல் நலம் பாதிக்கப்பட்டு லண்டன் மருத்துவமனையில் அனுமதிக்கப்பட்டுள்ளார்.

82 வயதாகும் மார்கரெட் தாட்சருக்கு நேற்று இரவு திடீரென உடல் நலம் பாதிக்கப்பட்டது. இதையடுத்து மத்திய லண்டன் நகரில் உள்ள செயின்ட் தாமஸ் மருத்துவமனைக்கு அவர் அழைத்துச் செல்லப்பட்டார். அங்கு அனுமதிக்கப்பட்ட தாட்சருக்கு மருத்துவப் பரிசோதனைகள் நடத்தப்பட்டன.

அவரது உடல் நலம் நிலையாக இருப்பதாக மருத்துவமனை தெரிவித்துள்ளது.

இங்கிலாந்தின் முதல் பெண் பிரதமர் தாட்சர் என்பது குறிப்பிடத்தக்கது. கடந்த 2002ம் ஆண்டு முதல் அவர் பொது நிகழ்ச்சிகளில் கலந்து கொள்வதில்லை. உடல் நலனைக் கருத்தில் கொண்டு பொது நிகழ்ச்சிகளில் கலந்து கொள்வதற்கும், சுற்றுப்பயணங்களை மேற்கொள்வதற்கும் டாக்டர்கள் தடை விதித்திருந்தனர்.

அதன் பின்னர் அவருக்கு அடிக்கடி வாதம் வந்து அவதிப்பட்டு வந்தார். இதன் காரணமாக அவருக்கு நினைவாற்றலும் கூட பாதிக்கப்பட்டது.

இன்னும் 2 நாட்களுக்கு தாட்சர் மருத்துவமனையில் இருப்பார் எனத் தெரிவிக்கப்பட்டுள்ளது.