கர்நாடக சட்டசபை தேர்தலில் 7 தொகுதிகளில் அதிமுக போட்டி

சென்னை: கர்நாடக சட்டசபைத் தேர்தலில் அதிமுக 7 தொகுதிகளில் போட்டியிடுகிறது. போட்டியிடும் வேட்பாளர்களின் பெயர்களை கட்சிப் பொதுச் செயலாளர் ஜெயலலிதா இன்று வெளியிட்டார்.

கர்நாடக சட்டசபைத் தேர்தலில் பாஜகவுடன் கூட்டணி அமைத்து அதிமுக போட்டியிடும் என எதிர்பார்க்கப்பட்டது. இது தொடர்பாக இரு கட்சிகளுக்கு இடையே பேச்சுவார்த்தையும் நடந்து வந்ததாக கூறப்பட்டது.

ஆனால் ஓகனேக்கல் விவகாரத்தில் எடியூரப்பா தலையிட்டு தமிழகத்தின் ஒட்டுமொத்த எதிர்ப்பையும் சம்பாதித்துக் கொண்டதால், கூட்டணி முயற்சியை அதிமுக கைவிட்டது.

இந்தநிலையில் கர்நாடக தேர்தலில் போட்டியிடும் அதிமுக வேட்பாளர்கள் பட்டியலை ஜெயலலிதா இன்று வெளியிட்டார். அதன்படி 7 தொகுதிகளில் அதிமுக போட்டியிடுகிறது.

இதுதொடர்பாக ஜெயலலிதா வெளியிட்ட அறிக்கையில், அதிமுக ஆட்சிமன்றக் குழு எடுத்த முடிவுப்படி மே மாதம் 10, 16, 22 ஆகிய தேதிகளில் கர்நாடக மாநிலத்தில் நடைபெறும் சட்டசபை பொதுத் தேர்தலில் போட்டியிடும் அதிமுக வேட்பாளர்களின் அதிகாரப்பூர்வ பட்டியல் வெளியிடப்படுகிறது.

மாநில அதிமுக செயலாளர் கே.ஆர்.கிருஷ்ணராஜ் காந்தி நகர் தொகுதியில் போட்டியிடுவார். தெய்வசகாயம் சாம்ராஜ்பேட்டையில் போட்டியிடுவார்.

ராஜாஜி நகரில் ராமசாமியும், சாந்தி நகரில் வா.புகழேந்தியும், கோலார்தங்கவயல் தொகுதியில் ஆனந்தராஜும், புலிகேசி நகரில் சாம்ராஜ் என்கிற அன்பரசனும், சிவாஜி நகரில் கே.மூர்த்தியும் போட்டியிடுவார்கள் என அறிவிக்கப்பட்டுள்ளது.