மகாராஷ்டிரா-படகுகள் மோதியதில் 19 பெண்கள் உட்பட 34 பேர் பலி

மும்பை: மகாராஷ்டிராவில் வெய்ன்கங்கா நதியில் சென்று கொண்டிருந்த இரண்டு படகுகள் மோதி கொண்ட விபத்தில் சுமார் 19 பெண்கள் உட்பட 34 பேர் பலியாகி இருப்பார்கள் என அஞ்சப்படுகிறது.

மகாராஷ்டிரா மாநிலம் விதர்பா பகுதியில் பந்தாரா மாவட்டத்தில் வெய்ன்கங்கா நதி ஓடுகிறது. இப்பகுதியில் இருப்பவர்கள் ஆற்றை கடப்பதற்கு படகுகளை அதிகம் பயன்படுத்தி வருகின்றனர்.

இங்கு காமாரி புடி என்ற இடத்தில் இருந்து சுமார் 12 கிமீ., தொலைவில் ஆற்றில் சென்று கொண்டிருந்த இரண்டு படகுகள் மோதி கொண்டது. இதில் இரண்டு படகுகளில் இருந்தவர்களும் ஆற்று நீரில் அடித்து செல்லப்பட்டனர்.

இது குறித்து அம்மாவட்ட எஸ்பி சுரேஷ் சாகர் கூறுகையில்,

இந்த படகுகளில் இருந்த பெண்கள் பெரும்பாலும் வேலைக்கு செல்பவர்கள். நேற்று மாலை அவர்கள் வேலை முடித்து வீட்டுக்கு திரும்பும் போது இந்த துயர சம்பவம் நடந்துள்ளது.

பந்தாரா மற்றும் அருகில் உள்ள கோன்டியா மாவட்ட நீச்சல் வீரர்கள் உடல்களை மீட்கும் பணியில் ஈடுபடுத்தப்பட்டு்ள்ளனர். இதுவரை 19 பெண்களின் உடல்கள் கண்டுபிடிக்கப்பட்டுள்ளது. இந்த விபத்தில் இறந்தவர்களின் எண்ணிக்கை 34 ஆக உயரும் என அஞ்சப்படுகிறது என்றார் அவர்.