அமெரிக்கா: நடுவானில் விமானம்-ஹெலிகாப்டர் மோதல்: 9 பேர் பலி

நியூயார்க்: அமெரிக்காவின் நியூஜெர்சி மாகாணத்தில், ஹட்சன் ஆற்றுக்கு மேலே பறந்து கொண்டிருந்த சிறிய ரக விமானமும், சுற்றுலா ஹெலிகாப்டரும் நேருக்கு நேர் நடுவானில் மோதி ஆற்றில் விழுந்தன. இந்த கோர விபத்தில் 9 பேர் பலியானார்கள்.

ஐந்து இத்தாலிய சுற்றுலாப் பயணிகளுடன் அந்த சுற்றுலா ஹெலிகாப்டர் சென்று கொண்டிருந்தது. ஹட்சன் ஆற்றுக்கு மேலே பறந்தபோது ஹெலிகாப்டரும், வி்மானமும் மோதிக் கொண்டன. இந்த விபத்தில் 9 பேர் உயிரிழந்தனர்.

ஹெலிகாப்டரும், விமானமும் மோதிக் கொண்ட காட்சியை நூற்றுக்கணக்கான பேர் நேரில் பார்த்துள்ளனர்.

இதுவரை 2 பேரின் உடல்கள் மீட்கப்பட்டுள்ளன. மற்ற உடல்கள் விமானம் மற்றும் ஹெலிகாப்டரின் இடிபாடுகளில் சிக்கியுள்ளன.

ஹெலிகாப்டரில் இத்தாலிய சுற்றுலாப் பயணிகள் தவிர ஒரு பைலட் இருந்தார். விமானத்தில் ஒரு குழந்தை உள்பட 3 பேர் இருந்துள்ளனர்.

குட்டி விமானம் குறைந்த உயரத்தில் பறந்து கொண்டிருந்தபோது எதிரே குறுக்கிட்ட ஹெலிகாப்டர் மீது மோதி நொறுங்கியதாக நேரில் பார்த்தவர்கள் கூறியுள்ளனர்.