ஆர்எம் வீரப்பன் பிறந்தநாள்-முதல்வர் நேரில் வாழ்த்து
சென்னை: ஆர்எம் வீரப்பனின் 84வது பிறந்தநாளை முன்னிட்டு தமிழக முதல்வர் கருணாநிதி இன்று அவரது இல்லத்துக்கு நேரில் சென்று வாழ்த்து தெரிவித்தார்.
எம்ஜிஆர் கழக தலைவரும், முன்னாள் அதிமுக அமைச்சருமான ஆர்எம் வீரப்பன் கடந்த 2004 நாடாளுமன்ற தேர்தல் முதல் திமுகவுக்கு ஆதரவு அளித்து வருகிறார்.
இந்நிலையில் அவர் இன்று 84வது பிறந்தநாளை தனது வீட்டில் மிகவும் எளிமையாக கொண்டாடினார். காலையில் பெரியார், அண்ணா ஆகியோரின் திருவுருவ படங்களுக்கு மாலை அணிவித்து மரியாதை செலுத்தினார்.
அவரது பிறந்தநாளை முன்னிட்டு தமிழக முதல்வர் கருணாநிதி அவரது இல்லத்துக்கு நேரில் சென்றார். அவருக்கு பொன்னாடை போர்த்தி வாழ்த்து தெரிவித்தார்.
முதல்வரை தொடர்ந்து மத்திய அமைச்சர் ஜெகத்ரட்சகன், நீதிக்கட்சி தலைவர் ஏசி சண்முகம் உள்ளிட்ட அரசியல் கட்சி தலைவர்களும், தொண்டர்களும் அவரை சந்தித்து வாழத்து தெரிவித்தனர்.
இன்று மாலை அண்ணா சாலையில் உள்ள ராணி சீதை மன்றத்தில் அவரது பிறந்தநாள் விழா நிகழ்ச்சிகள் நடக்கிறது. இந்த நிகழ்ச்சியில் பல்வேறு அரசியல் தலைவர்கள் மற்றும் கலை உலக நடத்திரங்கள் பங்கேற்பார்கள் என தெரிகிறது.