நானோ கார் விலை உயருமா? டாடா மழுப்பல்!

டெல்லி: நானோ கார்களின் விலையை உயர்த்தப்போவதாக வரும் செய்திகளில் உண்மையில்லை என்றும், இப்போது முன்பதிவு செய்யப்பட்டுள்ள நானோ கார்கள் அனைத்தும் ஏற்கெனவே அறிவிக்கப்பட்ட விலையிலேயே டெலிவரி செய்யப்படும் என டாடா மோட்டார்ஸ் அறிவித்துள்ளது.

ஆனால் புதிய புக்கிங்குகளுக்கும் இதே விலை நீடிக்குமா என்பதை சொல்வதற்கில்லை என இந்நிறுவனத்தின் நிர்வாக இயக்குநர் பிரகாஷ் எம் டெலாங் அறிவித்துள்ளார்.

"ஸ்டீல் மற்றும் டயர்களின் விலை கடுமையாக உயர்ந்துள்ளதால் பெரும்பாலான கார் உற்பத்தியாளர்கள் கார்களின் விலையை உயர்த்தும் முடிவில் உள்ளதாகக் கூறப்படுகிறது. நாங்கள் நிலைமையை கூர்ந்து கவனித்து வருகிறோம். விவரங்கள் பின்னர் அறிவிக்கப்படும்," என்றார் பிரகாஷ் டெலாங்.

டாடா நானோ கார்களுக்கு 2.06 லட்சம் பேர் விண்ணப்பித்திருந்தனர். இவர்களில் 1.55 லட்சம் பேரைத் தேர்வு செய்தது டாடா. முதல் கட்டமாக 13924 போருக்கு நானோ வழங்கப்பட்டது. 2010 மார்ச்சுக்குள் 1 லட்சம் பேருக்கு நானோ கார்களை வழங்கிவிடுவதாக அறிவித்துள்ளது.

மீதியுள்ளவர்களுக்கு அடுத்த கட்டமாக நானோ வழங்கப்படுமாம்.

இன்றைய நிலவரப்படி நானோ கார்கள் டெல்லியில் ரூ 1.23 லட்சம் முதல் 1.8 லட்சம் வரை விற்கப்படுகின்றன.